Trump í dómsal í Flórída

Í skjalamálinu svokallaða er Trump sakaður um að hafa tekið opinber gögn í leyfisleysi og um að hafa reynt að koma í veg fyrir að gögnin yrðu sótt á Mar-a-Lago, sveitaklúbb og heimili Trumps í Flórída. Lögmenn hans segja að meirihluti ákæranna í málinu séu ólögmætar vegna þess að þær snúist um opinber störf hans sem forseta og því njóti hann friðhelgi.

Sjá einnig: Krefst einnig friðhelgi í skjalamálinu

Eftir að Richard Nixon, fyrrverandi forseti, reyndi að eyða opinberum gögnum sem tengdust Watergate-hneykslinu voru samin lög sem á ensku kallast Presidential Records Act. Þau lög segja öll opinber gögn forseta í eigu almennings og að þeim beri að skila til þjóðskjalasafns Bandaríkjanna þegar forsetar láta af embætti.

Lögmenn Trumps halda því fram að sem forseti hafi hann getað skilgreint sérstök gögn sem hans einkaeign, samkvæmt PRA lögunum. Dómsmálaráðuneytið hefur áður harðlega gagnrýnt þann málflutning á þeim grunni að það fari beinlínis gegn tilgangi laganna.

Sjá einnig: Starfsmaður Trumps dró framburð sinn til baka eftir að hann skipti um lögmann

Trump og hans fólk hafa ítrekað haldið því fram að hann hafi svipt leynileg skjöl sem hann tók með sér leynd, sem honum var heimilt sem forseta, en þau hafa aldrei getað sannað það með. Þau hafa einnig haldið því fram að sem forseti hafi honum verið frjálst að skilgreina gögnin sem hans einkaeign og taka þau með sér.

Saksóknarar Jack Smith, sérstaks rannsakanda, dómsmálaráðuneytis Bandaríkjanna, segja reglurnar sem Trump vísar til ekki eiga við leynileg skjöl og þar að auki sé hann ekki ákærður fyrir að taka með sér persónuleg gögn.

Saksóknarar segja reglur um opinber gögn ekki verja Trump gegn lögunum né heimila honum einhliða að eigna sér leynileg skjöl. Þá megi hann ekki á þeirra grunni reyna að hindra framgang opinberrar rannsóknar.

Dómarinn Aileen M. Cannon, sem skipuð var í embætti af Trump sjálfum, mun hlusta á málflutning í dag og úrskurða svo í málinu í kjölfarið. Hvenær það verður liggur ekki fyrir. Hún hefur áður verið gagnrýnd fyrir að taka umdeildar ákvarðanir Trump í vil í þessu máli.

Trump og lögmenn hans hafa lagt mikið púður í það að reyna að tefja öll fjögur dómsmálin sem að honum beinast þessa dagana. Takist honum að tefja réttarhöldin fram yfir kosningar og sigri hann Joe Biden, gæti hann beitt völdum embættisins til að stöðva málaferlin gegn honum eða jafnvel náða sjálfan sig.