Segist Kenne­dy hafa rekið sig fyrir að standa við vísinda­leg heilindi

Nokkrir æðstu stjórnendur CDC sögðu af sér eftir að Kennedy rak Susan Monarez, forstjóra stofnunarinnar, innan við mánuði eftir að Bandaríkjaþing staðfesti skipan hennar í embættið. Níu fyrrverandi forstöðumenn stofnunarinnar vöruðu í kjölfarið við því að Kennedy ógnaði heilsu Bandaríkjamanna í grein sem þeir skrifuðu saman fyrr í þessum mánuði.

Monarez kemur fyrir heilbrigðisnefnd öldungadeildar Bandaríkjaþings í dag þar sem þingmenn ætla að spyrja hana út í brottreksturinn. Í skriflegri yfirlýsingu til nefndarinnar segir Monarez hafi sett henni afarkosti. Annað hvort samþykkti hún nýjar ráðleggingar frá stofnuninni um bóluefni án vísindalegs rökstuðnings fyrir þeim eða hún yrði rekin að öðrum kosti.

„Jafnvel undir þrýstingi gat ég ekki skipt út gögnum fyrir hugmyndafræði eða gefið afslátt af heilindum mínum,“ segir í yfirlýsingu Monarez. Hún hafi verið rekin fyrir að halda fast við vísindaleg heilindi.

Ráðgjafaráð sem Kennedy hreinsaði út tekur ákvörðun á næstu dögum

Kennedy hefur verið einn þekktasti andstæðingur bóluefna í heiminum um áraraðir og dreifst staðlausum og margrhröktum samsæriskenningum um öryggi þeirra og gagnsemi. 

Nýju ráðleggingarnar um bóluefni sem Monarez átti að leggja blessun sína yfir að óathuguðu máli eiga að koma frá sérstakri ráðgjafarnefnd CDC. Kennedy rak alla fulltrúa í henni á einu bretti í sumar og skipaði í staðinn skoðanasystkini sín. Búist er við að nefndin samþykki ráðleggingar sínar á fundi í þessari viku. Þær ráðleggingar hafa meðal annars áhrif á hvaða bóluefni sjúkratryggingar Bandaríkjamanna ná yfir.

Monarez ætlar einnig að segja þingnefndinni að Kennedy hafi þrýst á hana að reka starfsmenn stofnunarinnar án ástæðu eða áminningar.

Formaður þingnefndarinnar er Bill Cassidy, þingmaður repúblikana frá Louisiana, sem hafði efasemdir um skipan Kennedy sem ráðherra. Hann greiddi á endanum atkvæði með skipan Kennedy eftir að hann sagðist hafa fengið ákveðnar tryggingar frá honum varðandi bóluefni. Kennedy gekk hins vegar strax á bak þeirra trygginga eftir að hann var kominn í embættið. 

Cassidy, sem er sjálfur læknir, hefur sagst hafa áhyggjur af alvarlegum ásökunum sem hafa komið fram um ástandið innan CDC: