For­maður Við­reisnar í Reykja­vík sakaður um fjár­drátt

Upp komst um málið á laugardag við yfirferð á ársreikningi félagsins fyrir árið 2025 en til stóð að leggja hann fram á aðalfundi Viðreisnar í Reykjavík sem fram fór um helgina. Því var frestað þegar misræmi uppgötvaðist í bókhaldi.

Svanborg Sigmarsdóttir, framkvæmdastjóri Viðreisnar, staðfestir að hinn grunaði hafi millifært fjórar til fimm milljónir króna yfir á persónulega reikninga á árunum 2024 til 2026. Hann hafi viðurkennt brotin og nú þegar endurgreitt meirihluta fjárhæðarinnar. Hann hafi svo skuldbundið sig til að endurgreiða þær rúmlega 1,7 milljónir króna sem eftir standa.

Samkvæmt heimildum fréttastofu er um að ræða Natan Kolbeinsson, fyrrverandi formann Viðreisnar í Reykjavík. Hann hefur áður gerst sekur um fjárdrátt og var dæmdur í skilorðsbundið fangelsi árið 2017 fyrir að hafa dregið að sér fé úr sjóðum Landssambands æskulýðsfélaga en hann var um tíma formaður og gjaldkeri sambandsins.

Kært til lögreglu í dag

Hann hafði endurgreitt fjármunina sem hann tók úr sjóðum Viðreisnar árið 2024 áður en það fjárhagsár rann út og uppgötvaðist fjárdrátturinn því ekki við yfirferð á ársreikningi þess árs.

Svanborg segir málið afskaplega leiðinlegt og að stjórn Viðreisnar í Reykjavík hafi ákveðið að kæra málið til lögreglu. Það hafi svo verið gert í dag.

„Það kemur í ljós þegar verið er að setja upp ársreikninginn, við reglubundið eftirlit, að reikningarnir stemma ekki. Þá fórum við náttúrulega að skoða þetta nánar og þá kom í ljós að það var trúnaðarmaður innan þessa félags sem hafði dregið að sér fé.“ Hann sé nú búinn að segja sig frá öllum trúnaðarstörfum innan Viðreisnar.

Svanborg bætir við að um sé að ræða opinbert fé og frjáls framlög félagsmanna sem þurfi að fara vel með.

Fréttin er í vinnslu og verður uppfærð.