Vara við „perra­gler­augum“

Persónuvernd vekur athygli á yfirlýsingunni í tilkynningu á vef sínum. Þar segir að gleraugun geti verið búin myndavélum og hljóðnemum sem gera notendum kleift að taka upp myndir og hljóð án þess að þeir sem verða fyrir upptöku verði þess varir. 

„Ráðið bendir á að sérstök áhætta geti skapast við notkun þeirra á viðkvæmum stöðum, svo sem á sjúkrahúsum, í skólum og á vinnustöðum, auk þess sem huga þurfi sérstaklega að vernd barna,“ segir í tilkynningunni. 

Hjálpartæki sjónskertra

Lögð er áhersla á að einstaklingum þurfi að vera ljóst hvenær upptaka fer fram, til dæmis með skýrum ljós- eða hljóðmerkjum. Þá geti notendur snjallgleraugna sjálfir talist ábyrgðaraðilar að vinnslu persónuupplýsinga, meðal annars þegar myndefni er birt á opinberum samfélagsmiðlareikningum.

Gleraugun njóta mikilla vinsælda erlendis og geta umbreytt lífi fólks sem glímir við sjónskerðingu. Í grein Breska ríkisútvarpsins er rætt við lögblindan mann sem notar gleraugun til að „sjá“ þegar hann gengur á milli staða. Myndavélin skynjar hvaða hlutir eru í kringum hann og er honum tilkynnt hvað sé fram undan í gegnum hátalara gleraugnanna. 

Þau eru þó einnig vinsæl hjá þeim sem vilja taka myndbönd af fólki án þess að það viti af því. Dæmi eru um að fólk eigi í samskiptum við annað fólk á götum úti og sjái svo myndbönd af samtalinu á netinu síðar, án þess að hafa nokkra hugmynd um að sá sem rætt var við var að taka allt upp með gleraugunum. Þannig hafa gleraugun fengið viðurnefnið „perragleraugu“.