Gamall Volvo stóð í ljósum logum í Breið­holti

Slökkviliðinu barst tilkynning um eldinn um klukkan fimm en hafði þegar slökkt hann þegar blaðamaður sló á þráðinn til Stefáns Kristinssonar, varðstjóra hjá slökkviliðinu á höfuðborgarsvæðinu.

Hann segir að engan hafi sakað.

Eldurinn kviknaði í bílnum er hann stóð á bílastæði við fjölbýlishús í Fellunum í Breiðholti í Reykjavík en Stefán kveðst ekki vita hvað olli eldinum. 

Spurður út í gerð bílsins svarar hann að um gamlan Volvo sé að ræða og myndefni af vettvangi virðist staðfesta það.

Í dagbók lögreglu segir frá máli þar sem tilkynnt var um eld í bifreið og er væntanlega átt við þetta mál. Segir þar að bifreiðin sé talin ónýt reynt hafi verið að koma í veg fyrir frekara tjón á öðrum bifreiðum.