Einn fluttur á slysa­deild eftir að eldur kviknaði við Tryggva­götu

Davíð Friðjónsson varðstjóri segir í samtali við fréttastofu að slökkviliðinu á höfuðborgarsvæðinu hafi útkallið hafi borist um klukkan klukkan fimm í morgun. 

Einn hafi verið í íbúðinni þar sem eldurinn varð, sem er á efstu hæð í þriggja hæða húsi við Tryggvagötu, en hann hafi þegar komið sér út þegar slökkvilið bar að garði. Nærliggjandi íbúðir voru einnig rýmdar.

„Ég get ímyndað mér töluvert tjón á íbúðinni en ég veit það ekki,“ segir Davíð en hann kveðst ekki vita nákvæmlega hvar eldurinn kom upp en lögregla rannsakar eldsupptök.

Hann segir að einn hafi verið fluttur á slysadeild til að fara í skoðun vegna hugsanlegrar reykeitrunar. Hann hafi ekki verið þungt haldinn.

Nú er búið að reykræsta, segir Davíð, og nú sé unnið að því að hreinsa upp vatn í íbúðinni.