Mikið eigna­tjón vegna bruna í efnalaug við Háa­leitis­braut

„Við fáum tilkynningu upp úr tvö í nótt um eld í þessu verslunarhúsnæði við Háaleitisbraut. Við sendum allt okkar viðbragð, þannig það fara fjórar stöðvar af stað, fjóra mannaða dælubíla. Við okkur blasir töluverður eldur og einhverjar sprengingar þegar við komum á staðinn, sprengingar í eldinum,“ segir Davíð Friðjónsson varðstjóri hjá slökkviliðinu á höfuðborgarsvæðinu.

Hann segir engin hættuleg efni á staðnum og það hafi gengið nokkuð vel að slökkva miðað við umfang sem var þegar slökkvilið kom á staðinn. Um tvo tíma tók að slökkva eldinn og ganga frá.

Hann segir eignatjónið verulegt í efnalauginni og bundið við efnalaugina. Hann segir húsið hafa verið mannlaust og ekkert sé vitað um eldsupptök að svo stöddu.

„Við afhentum lögreglu vettvanginn upp úr fjögur og hún tekur við rannsókn strax.“

Fréttin hefur verið uppfærð með viðtali við varðstjóra klukkan 06:57.