Rukkaðar fyrir sætin: Blöskrar græðgi vertsins, sem segir gjaldið sjálf­sagt

Ólöf Dóra Bartels Jónsdóttir greindi frá því í Facebookhópnum Neytendahorninu í dag að hún hefði ásamt vinkonu sest inn á veitingastaðinn Hressó við Austurstræti í Reykjavík í gær til þess að fá sér í gogginn. Þegar þær greiddu reikninginn hafi þeim verið tjáð að staðurinn rukkaði 1.500 krónur fyrir setuna á staðnum.

„Auka 1500 kr. fyrir borðið því það var þjóðhátíðardagur!“

Á kvittunum sem hún lætur fylgja færslunni má sjá liðinn „0.50 Holiday fee — 750 kr.“ Það mætti útleggjast sem „0,50 stórhátíðargjald — 750 kr.“ Það gerir sum sé fimmtánhundruðkall fyrir tvo að setjast til snæðings á 17. júní.

Enginn kannaðist við að hafa verið látinn vita

„Mér náttúrulega snarbrá af því að við höfðum ekki verið látnar vita fyrir fram. Ég náttúrulega röflaði pínulítið af því að þarna var bara saklaus ungur maður að afgreiða. Hann átti ekkert að verða fyrir barðinu á ákvörðunum eigandans um að rukka sérstaklega fyrir borðið,“ segir Ólöf Dóra í samtali við Vísi. 

Annar starfsmaður á staðnum hafi þá skorist í leikinn og tjáð þeim að allir væru látnir vita fyrir fram af stórhátíðargjaldinu. Þær hafi spurt fólk á nærliggjandi borðum hvort það vissi af gjaldinu en enginn hafi kannast við það.

Þeim hafi þá verið boðið upp á kakóbolla í boði hússins fyrir ómakið en þær afþakkað hann pent. „Okkur fannst það líka heldur skrýtið.“

Vöruðu fólk við í dyrunum

Á útleið hafi þær mætt fólki og vinkonan látið það vita að rukkað væri fyrir að setjast til borðs á staðnum. 

„Það voru Íslendingar sem voru að koma inn og þau náttúrulega bara sneru sér við á punktinum. Mig grunar að veitingahúseigendur séu að reyna að pumpa gjaldið upp eins og þeir geta vegna þess að túrista vita ekki betur. Þeir vita ekki að þetta er óeðlilegt. Við sem Íslendingar höfum aldrei lent í öðru eins. Það er auðvitað hægt að græða heilmikið á því að rukka fimmtánhundruðkall fyrir borðið á 17. júní, sérstaklega af túristum sem vita ekki betur.“

Hún hafi fundið sig knúna til að vara við þessum viðskiptaháttum á Facebook til þess að reyna að koma í veg fyrir að svona lagað endurtaki sig. „Til að reyna að setja stopp á þessa gengdarlausu græðgi.“

Þá hafi hún haft sambandi við Neytendasamtökin, sem hafi kvatt hana til að tilkynna málið til Neytendastofu. Neytendastofa geti í framhaldinu úrskurðað hvort gjaldið standist yfir höfuð lög.

Alþekkt í bransanum en mun glaður endurgreiða

Bragi Skaftason, eigandi Hressó, segir í samtali við Vísi að fjöldi veitingastaða leggi á stórhátíðargjald á svokölluðum rauðum dögum. Það sé alþekkt í bransanum að á rauðum dögum sé greitt himinhátt álag á dagvinnutaxta og því sé launakostnaður hár á dögum sem 17. júní. Þá bendir hann á að veitingamaður geri vel nái hann að halda launakostnaði undir helmingi veltu veitingastaðarins.

„Þannig að ég stend alveg við þetta, við erum að bera alveg gríðarlega mikinn kostnað af þessum degi. Þegar við fáum níutíu prósent ofan á, þá er þetta þungur róður.“

Þá segir hann að eftir því sem hann komist næst hafi allir verið látnir vita af gjaldinu fyrir fram og engar mótbárur hafi borist nema frá borði Ólafar Dóru og vinkonu hennar.

„Ef það er eins og hún segir, að henni hafi ekki verið tilkynnt um þetta, þá skal ég glaður endurgreiða henni þetta gjald og biðjast afsökunar á því.“