Banda­ríkja­stjórn neitar að kalla Rússa „árásaraðila“

Leiðtogar G7 hafa notað þetta orðalag í öllum sínum yfirlýsingum frá því Rússar réðust inn í Úkraínu þann 24. febrúar 2022.

Þetta hafa blaðamenn Financial Times eftir heimildarmönnum sínum og segja þeir einnig að ekki sé ljóst hvort Vólódímír Selenskí, forseti Úkraínu, muni ávarpa fundinn á mánudaginn eins og til stóð.

Reuters segir svipaða sögu af drögum af yfirlýsingu sem leggja á fyrir allsherjarráð Sameinuðu þjóðanna. Bandaríkjamenn hafi neitað að leggja blessun þeirra á stuðningsyfirlýsingu við Úkraínu, landamæri ríkisins og fullveldi þar sem innrás Rússa er fordæmd.

Undanfarin ár hefur sambærileg tillaga verið lögð fram með stuðningi yfirvalda í bandaríkjunum en heimildarmaður Reuters segir að rúmlega fimmtíu ríki hafi þegar lýst yfir stuðningi við hana að þessu sinni.

Reiddist Selenskí

Trump virðist hafa orðið reiður út í Selenskí þegar sá síðarnefndi biðlaði til Bandaríkjamanna í gærmorgun að hætta að dreifa áróðri frá Rússlandi um Úkraínu og innrás Rússa í Úkraínu. Bað hann Trump-liða um að virða sannleikann, samhliða því sem hann sagðist bera mikla virðingu fyrir Trump og Bandaríkjunum.

Selenskí nefndi einnig að ummæli Trumps um magn hernaðaraðstoðar Bandaríkjamanna handa Úkraínumönnum væru ekki rétt.

Forsetinn bandaríski birti færslu á samfélagsmiðli sínum þar sem hann kallaði Selenskí meðal annars einræðisherra og dreifði öðrum lygum um stríðið í Úkraínu, sem margar eiga rætur í Rússlandi. Ítrekaði hann orð sín svo aftur í gærkvöldi á ráðstefnu í Flórída.

Mike Waltz, þjóðaröryggisráðgjafi Trumps, gagnrýndi Selenskí í viðtali við Fox News í dag og sagði ráðamenn í Bandaríkjunum pirraða yfir ástandinu í Úkraínu. Óásættanlegt væri að talað væri illa um Bandaríkin.

Hann sagði Selenskí að draga úr árásum á Trump og skrifa undir umdeilt samkomulag sem Bandaríkjamenn lögðu á borð hans á dögunum.

Það samkomulag felur í sér að veita Bandaríkjunum eignarrétt á stórum hluta náttúruauðlinda Úkraínu, án nokkurra öryggistrygginga. Selenskí hefur neitað að skrifa undir samkomulagið.

Sjá einnig: Neitaði að skrifa undir plagg Trumps um sjald­gæfa málma

„Skrifaðu undir samkomulagið,“ sagði Waltz.

Segja ummæli Trumps hættuleg

Espen Barth Eide, utanríkisráðherra Noregs, sagði í samtali við E24 í dag að Trump væri að enduróma áróður frá Rússlandi. Eide er staddur á fundi G20 ríkjanna í Suður-Afríku og segir ástandið í heimsmálum vera til umræðu þar. Ummæli og aðgerðir Trumps og Úkraínu stríðið væri mönnum efst í huga.

Hann sagði ummæli Trumps um Selenskí vera „mjög ósanngjörn“ og „hreinlega röng“. Þau væru mjög alvarleg og hættuleg.

„Forseti Bandaríkjanna er að enduróma þekktan áróður frá Rússlandi. Þetta er mjög hættulegt.“

Michael Roth, formaður utanríkismálanefndar þýska þingsins, segir að samskipti Evrópu og Bandaríkjanna hafi tekið stakkaskiptum á undanförnum dögum. Hann sagði Trump enduróma áróður frá Rússum.

Þessum áróðri hafi verið dreift um árabil en Roth sagðist aldrei hafa talið mögulegt að honum yrði einhvern tímann básúnað úr Hvíta húsinu.

Þetta sagði Roth í sjónvarpsviðtali í morgun en hann sagði einnig að Evrópa stæði einsömul. Trump hefði tekið sér afstöðu með einræðisherrum og afleiðingarnar yrðu sársaukafullar.

Hann sagði einnig erfitt að ímynda sér að Þýskaland myndi ekki koma að því að mögulega senda friðargæsluliða til Úkraínu í framtíðinni. Þrátt fyrir það yrði erfitt að tryggja frið í Úkraínu til langs tíma án Bandaríkjanna og því yrði að semja við Trump.