Dælubílar slökkviliðsins voru kallaðir út fjórum sinnum í nótt en slökkviliðinu barst útkall um klukkan fimm morgun vegna skemmtistaðar. Hvítur reykur hafði sést inni á skemmtistaðnum en á leiðinni þangað kom í ljós að einhver hafði hleypt úr duftslökkvitæki.
Var því ekki þörf á slökkviliði á vettvangi og dælubíllinn sendur til baka. Þá kemur fram að 85 sjúkraflutningar voru síðasta sólarhring og 48 af þeim á næturvaktinni.
„Útköll á dælubíla eru skráð fjögur og helst er það þegar allar okkar stöðvar voru kallaðar að veitingahúsi í Ármúla í gærkveldi þar sem reykur var innandyra og eldur en mjög fljótlega var eldurinn slökktur og staðurinn reykræstur í kjölfarið,“ segir í færslunni.
