Geð­læknir telur Magnús Aron sak­hæfan

Þetta kemur fram gæsluvarðhaldsúrskurði Héraðsdóms Reykjavíkur, sem Landsréttur staðfesti 2. ágúst síðastliðinn og var birtur nýverið.

Þar segir að mat dómskvadds geðlæknis á geðheilbrigði Magnúsar Arons sé að hann hafi ekki verið haldinn neinum þeim einkennum, sem talin eru upp í ákvæðum almennra hegningarlaga um sakhæfi, á verknaðarsstundu. Því sé ekkert sem komi í veg fyrir að refsing geti borið árangur verði hann fundinn sekur.

Hafi veist með hrottalegum hætti að nágranna sínum

Magnús Aron er ákærður fyrir að hafa veist að nágranna sínum Gylfa Bergmann Heimissyni. Fyrst á stigagangi hússins við Barðavog og svo utan við húsið. Þegar þangað var komið hafi Magnús Aron sparkað í og kýlt Gylfa, náð honum í jörðina og þar sem hann lá á jörðinni kýlt, sparkað og traðkað margsinnis á honum. Þar á meðal andliti og brjóstkassa með þeim afleiðingum að Gylfi hlaut húðblæðingar og mar í andliti og hálsi, brot á neðri kjálka, kinnbeinum, nefbeinum og tungubeini. Gylfi lést af áverkum sínum á vettvangi.

Neitar sök og segir nágrannann hafa verið ógnandi

Magnús Aron neitar sök í málinu og í úrskurði héraðsdóms kemur fram að hann hafi sagt við yfirheyrslu lögreglu að Gylfi hafi komið til sín umrætt kvöld og viljað ræða við sig. Taldi hann Gylfa hafa verið ógnandi og hafa ætlað að ryðjast eða brjótast inn í íbúðina, hann hafi hindrað Gylfa í því og í kjölfarið hafi komið til átaka þeirra á milli frammi á gangi og í stigahúsinu

Magnús hafi sagt mikið hafa gengið á og Gylfi hafi haft yfirhöndina og slegið hann ítrekað í andlitið. 

Þegar út var komið hafi hann fljótlega náð að yfirbuga Gylfa og sparkað ítrekað í andlit hans þar sem hann lá á jörðinni. Loks hafi hann hætt og þá ákveðið að hringja eftir aðstoð lögreglu og sjúkraliðs en síðar verið handtekinn við komu lögreglu.

Talinn afar hættulegur

Í úrskurði héraðsdóms segir að Magnús Aron eigi sér sögu hjá lögreglu vegna ofbeldisfullrar hegðunar og hann hafi jafnframt hlotið dóm fyrir líkamsárás og barnaverndarbrot. Að mati lögreglu sé hann talinn afar hættulegur.

Með vísan til rannsóknargagna og alvarleika þess brots sem rökstuddur grunur er um að Magnús Aron hafi framið, er fallist á að gæsluvarðhald sé nauðsynlegt með tilliti til almannahagsmuna.

Þá segir jafnframt að það stríði gegn réttarvitund almennings ef maður sem er undir sterkum grun um að hafa framið árás sem mannsbani hlýst af gangi laus á meðan málið er til meðferðar hjá lögreglu og eftir atvikum dómstólum.