Síldarvinnslan, sem er 64 ára gamalt fyrirtæki, var áður í breiðri eign Norðfirðinga. Núna er Samherji stærsti hluthafinn, með um 44 prósenta hlut, en Samherjamenn hafa gefið það út að þeir vilji dreifðara eignarhald. Næst stærsti hluthafinn, Kjálkanes, með um 34 prósent, hyggst einnig minnka við sig.
Stjórn Síldarvinnslunnar kynnti í febrúar að stefnt væri að skráningu félagsins í Kauphöll Íslands á fyrri hluta þessa árs. Í Neskaupstað er hvatt til þess að heimamenn grípi tækifærið. Einkum er horft til SÚN, Samvinnufélags útgerðarmanna, sem fram undir síðustu aldamót var helsti hluthafinn, en er núna sá þriðji stærsti með ellefu prósenta hlut.
„SÚN er búið að ákveða það að við ætlum allavega ekki að selja neitt af okkar hlutabréfum. Við ætlum frekar að huga að því að kaupa hlutabréf, þó að ekki sé búið að ákveða hversu mikið það verður,“ segir Guðmundur R. Gíslason, framkvæmdastjóri SÚN, í fréttum Stöðvar 2.
„Auðvitað vonast ég til að heimamenn sjái tækifæri í þessu, að kaupa eignarhluti,“ segir Jón Björn Hákonarson, bæjarstjóri Fjarðabyggðar.
„Það sem er náttúrlega mikilvægt, hvort sem það er Síldarvinnslan eða önnur fyrirtæki, er að það sé bara traustur og góður eigendahópur. Ég held að það sé lykilatriðið,“ segir Gunnþór Ingvason, forstjóri Síldarvinnslunnar, en hún er með 360 manns í vinnu og næst stærsta fyrirtæki Austurlands, á eftir Alcoa Fjarðaáli.
„Við höfum séð það bara hér í uppbyggingu á Síldarvinnslunni síðustu áratugina að þar hefur skipt gríðarlega miklu máli að hafa framsýna eigendur og öfluga stjórn að baki félaginu,“ segir Gunnþór.
Í gegnum Samvinnufélagið hafa Norðfirðingar séð hluta af arðinum af Síldarvinnslunni renna til samfélagsverkefna. Í síðustu viku sögðum við frá skrifstofuklasanum Múlanum. Útsýnispallur við vitann austast í Neskaupstað er annað dæmi og SÚN, ásamt Síldarvinnslunni, lagði einnig til fé á móti ríkinu til að malbika Norðfjarðarflugvöll.
„Við höfum styrkt sveitarfélagið, eða greiddum það nánast að fullu, að klæða félagsheimilið.
Svo erum við með menningar- og viðurkenningarsjóð sem við veitum úr tvisvar á ári. Þar erum við oft að veita tugum milljóna bara í menningar- og íþróttaverkefni og ýmislegt fleira,“ segir framkvæmdastjóri SÚN.
„Að sjálfsögðu vill maður sjá þetta sem mest í eigu heimamanna. En fyrst og síðast að þetta sé góður rekstur. Þannig tryggir maður hann í sessi,“ segir bæjarstjórinn.
Hér má sjá frétt Stöðvar 2:
