Björguðu manni úr sjónum í Reykjavíkurhöfn

Fjölmennt lið viðbragðsaðila var kallað út að höfninni í miðbæ Reykjavíkur, skammt frá Hörpu, um tíuleytið í kvöld vegna manns sem dottið hafði í sjóinn. Manninum var bjargað upp úr höfninni um fimmtán mínútum eftir að útkallið barst, að sögn varðstjóra hjá slökkviliði höfuðborgarsvæðisins.

Hlynur Höskuldsson varðstjóri segir í samtali við Vísi að fyrsta útkall hafi hljóðað upp á einstakling sem dottið hefði í sjóinn og væri meðvitundarlaus. Atvikið reyndist þó ekki jafnalvarlegt og talið var í fyrstu. Hlynur hafði ekki upplýsingar um líðan mannsins nú en hann hafi þó verið með meðvitund þegar honum var komið upp í sjúkrabíl.

Slökkvibíll, körfubíll, kafarabíll og fjórir sjúkrabílar voru sendir á vettvang þegar útkallið barst. Hlynur gerir þannig ráð fyrir að allt að tólf manna lið viðbragðsaðila hafi farið á staðinn. Ekki fengust upplýsingar um það hvernig slysið bar að eða hvort maðurinn hafi verið einn á ferð.