Stórsigrar hjá ÍBV og Val | Öll úrslit dagsins

Valur, ÍBV, Selfoss og Grótta eru með fullt hús stiga eftir leikina tvo sem búnir eru í Olís-deild kvenna, en fimm leikir í annari umferðinni fóru fram í dag. Valur og ÍBV unnu stórsigra.

Valur vann sextán marka sigur á ÍR, 35-19, eftir að hafa verið 17-10 yfir í hálfleik. Kristín Guðmundsdóttir skoraði tíu mörk fyrir Val, en næst kom Bryndís Elín Halldórsdóttir með sex mörk.

Hjá ÍR var Brynhildur Bergmann Kjartansdóttir markahæst sem fyrr með sjö mörk. Valur með fjögur stig eftir fyrstu tvo leikina, en ÍR ekkert.

Mörk Vals: Kristín Guðmundsdóttir 10, Bryndís Elín Halldórsdóttir 6, Gerður Arinbjarnar 5, Morgan Marie McDonald 5, Íris Pétursdóttir Viborg 3, Vigdís Birna Þorsteinsdóttir 3, Tanja Geirmundsdóttir 1, Ragnhildur Hjartardóttir 1, Kristín Arndís Ólafsdóttir 1.

Mörk ÍR: Bryndhildur Bergmann Kjartansdóttir 7, Silja Ísberg 4, Sólveig Lára Kristjánsdóttir 4, Karen Tinna Demian 2, Monika Jovisic 1, Petra Waage 1.

ÍBV burstaði nýliða Aftureldingar með 20 marka mun í Vestmannaeyjum í dag, 41-21. Staðan var 22-8 í hálfleik. Greta Kavaliouskaitc skoraði níu fyrir ÍBV, en það gerði Vera Lopez einnig.

Dagný Huld Birgisdóttir gerði sex mörk fyrir nýliðana sem hafa fengið tvo stóra skelli í fyrstu umferðunum á meðan ÍBV hefur unnið fyrstu tvo leikina.

Mörk ÍBV: Greta Kavaliouskaitc 9, Vera Lopez 9, Telma Amado 5, Kristrún Hlynsdóttir 4, Ester Óskarsdóttir 3, Sirrý Rúnarsdóttir 3, Sandra Gísladóttir 2, Ásta Björt Júlíusdóttir 2, Drífa Þorvaldsdóttir 2, Díana Dögg Magnúsdóttir 2.

Mörk Aftureldingar: Dagný Huld Birgisdóttir 6, Ingibjörg Bergrós Jóhannesdóttir 4, Telma Rut Frímannsdóttir 3, Hekla Daðadóttir 3, Magnea Rós Svansdóttir 1, Vigdís Brandsdóttir 1.

Sjáðu einnig: Umfjöllun og viðtöl: Grótta - Stjarnan 24-20 | Grótta með fullt hús stiga

Fram vann sinn fyrsta leik í Olís-deildinni þetta tímabilið þegar liðið vann eins marks sigur á HK, 19-18, í hörkuleik í Digranesi. HK leiddi í hálfleik, 10-9.

Þórhildur Braga Þórðardóttir og Sóley Ívarsdóttir gerðu fimm mörk hvor fyrir HK, en Hildur Þorgeirsdóttir gerði sjö fyrir gestina. Fram með tvö stig, en HK ekkert eftir fyrstu tvo leikina.

Mörk HK: Þórhildur Braga Þórðardóttir 5, Sóley Ívarsdóttir 5, Eva Hrund Harðardóttir 3, Aníta Björk Bárðardóttir 2, Emma Sardarsdóttir 2, Elva Arinbjarnar 1.

Mörk Fram: Hildur Þorgeirsdóttir 7, Elísabet Gunnarsdóttir 4, Ásta Birna Gunnarsdóttir 4, Hekla Rún Ámundadóttir 2, Hulda Dagsdóttir 1, Ragnheiður Júlíusdóttir 1.

Selfoss vann sinn annan sigur í deildinni, en þær unnu tíu marka sigur á KA/Þór 29-19 í dag. Selfoss var 16-9 yfir í hálfleik, en Adina Maria Ghido­arca og Car­men Palam­ariu gerðu sjö mörk hvor fyrir heimastúlkur á Selfossi.

Erla Hleiður Tryggva­dótt­ir og Birta Fönn Sveins­dótt­ir voru markahæstar hjá gestunum með fimm mörk hvor, en KA/Þór er með eitt stig eftir leikina tvo sem búnir eru.

Fylkir vann FH 29-24, en Fylkir tapaði í fyrstu umferðinni fyrir Stjörnunni á meðan FH gerði jafntefli við KA/Þór. Staðan í hálfleik var 17-9.

Ingibjörg Pálmadóttir var markahæst með sex mörk hjá gestunum, en Thea Imani Sturludóttir gerði sjö fyrir Fylki.

Einn leikur fer svo fram á morgun þegar Haukar og Fjölnir mætast í Schenker-höllinni klukkan 18:15.