Donni sneri aftur eftir að­gerð

Kristján, eða Donni eins og hann er alla jafnan kallaður, tók því nokkuð rólega í endurkomunni og skoraði eitt mark úr fjórum skotum en liðið vann leikinn þægilega.

Þetta var hans fyrsti leikur frá því í desember en Donni þurfti að draga sig úr landsliðshópnum og missti af EM í janúar eftir að upp komst um kviðslit.

Skanderborg er í öðru sæti dönsku deildarinnar og eltir taplausa toppliðið Aalborg.

Aalborg sótti 29-32 sigur í leik sínum gegn Ribe-Esbjerg í dag. Elvar Ásgeirsson skoraði tvö mörk úr átta skotum fyrir Ribe-Esbjerg í þeim leik.

Á sama tíma unnu lærisveinar Arnórs Atlasonar í liði Holstebro 38-37 sigur gegn Mors-Thy eftir mikla dramatík á lokamínútunum. Síðustu sóknirnar voru í raun lygilegar, liðin töpuðu boltanum og brutu af sér til skiptis, áður en Nikolaj Markussen skoraði sigurmarkið þegar þrjár sekúndur voru eftir.

Jóhannes Berg Andrason nýtti sín færi fyrr í leiknum og skoraði fimm mörk úr fimm skotum fyrir Holstebro, sem situr í sjöunda sæti deildarinnar.