Fór 27 hringi tíu vikum eftir barns­burð: „Magnað hvað líkaminn getur“

Mari ákvað að stimpla sig út eftir 27. hring og hún viðurkennir að það sé í raun óskiljanlegt hve langt hún náði fyrir Íslands hönd í Elliðaárdalnum nú um helgina í ljósi þess að sonur hennar kom í heiminn í ágúst.

„Ég skil ekki. Ég er búin að vera að hlaupa svona 5-8 kílómetra á dag síðan ég fæddi Ljónsa. Það er magnað hvað líkaminn getur. Við hættum alltaf mikið fyrr þegar við höldum að við séum búin. Þegar ég hringdi og sagði að það passaði bara að hætta núna þá slokknaði bara á líkamanum. 

Ég hefði ekki getað hlaupið síðasta hring hraðar því líkaminn segir bara: „Nei, nú er ég búinn.“ Af því að þú ert búin að taka ákvörðun. Þess vegna er svo gott að vera alltaf með lengra markmið,“ sagði Mari í viðtali við Garp I. Elísabetarson og Tinnu Miljevic í beinni útsendingu Vísis. Viðtalið má sjá hér að neðan.

Mari sá svo sannarlega ekki eftir því að hafa tekið þátt þrátt fyrir skelfilegt veður um helgina en hlakkaði vissulega til að komast í heita sturtu.

„Þetta er búið að vera ÓGEÐSLEGA gaman. Ég er í svo rosalega flottu teymi. Engin samkeppni. Ógeðslega gaman. Yndislegt,“ sagði Mari sem er í fimmtán manna landsliði Íslands á HM og var sú fjórða sem ákvað að láta gott heita.

Aðspurð um veðrið sagði hún íslensku keppendurna hafa verið duglega að skipta um föt eftir hvern hring en í bakgarðshlaupi eru hlaupnir 6,7 kílómetrar á klukkutíma fresti.

„Þetta truflaði mig minna en ég hélt. Þegar ég horfði út í morgun hugsaði ég: „Djöfulsins rigning. Megum við ekki fá tvo hringi þurra?“ Svo kom ég hingað og það var alveg þurrt í þrjá hringi og það var bara ógeðslega næs.

Við bara skiptum um föt í hverjum einasta hring,“ sagði Mari.

Hún hefur áður hlaupið 50 hringi í bakgarðshlaupi, eða 335 kílómetra, og segist alveg hafa getað farið lengra að þessu sinni. Hún grínaðist hins vegar með að maðurinn hennar, Njörður, þyrfti hjálp með hinn tveggja mánaða gamla Óliver Leo.

„180 kílómetrar er ógeðslega flott tala. 200 er líka ógeðslega flott tala en þá kem ég heim svo seint, fæ enga hvíld og Njöddi er bara ósofinn í margar nætur því „mamma er að hlaupa“ með eitthvað smábarn heima. Hvað á maður að halda lengi áfram?“ sagði Mari hlæjandi áður en hún fékk fjölmörg faðmlög og hamingjuóskir frá viðstöddum í Elliðaárdalnum.