Landsliðskonur Íran strjúka eftir Asíumótið

Leikmennirnir fimm eru sagðir gista í öruggu húsnæði á vegum alríkislögreglu Ástralíu. Leikmenn í íranska liðinu eru sagðir hafa óttast um öryggi sitt eftir að þær voru kallaðar „svikarar á stríðstímum“ í útsendingu íranska ríkissjónvarpsins í kjölfar þess að þær neituðu að syngja með íranska þjóðsöngnum fyrir leik á mótinu.

Í sömu útsendingu var leikmönnum hótað viðurlögum við komuna heim til Íran.

Samkvæmt fréttum The Athletic áttu sér stað fundir milli Knattspyrnusambands Asíu, FIFA og stjórnvalda í Ástralíu um öryggi leikmannana og hvort hægt væri að lengja dvöl liðsins í Ástralíu öryggis þeirra vegna. Íran lauk keppni á mótinu á sunnudag.

Snúið er fyrir liðið að fljúga heim til Íran sökum skerðingar á flugsamgöngum í Miðausturlöndum eftir árásir Bandaríkjanna og Ísraels sem hófust í Íran fyrir rúmri viku síðan.

Liðið átti aftur á móti að fljúga áleiðis heim í gær, en samkvæmt frétt The Athletic urðu fimm leikmenn liðsins eftir í Ástralíu.