Handbolti

Íslendingaliðið tapaði stórt en fer í umspil

Aron Guðmundsson skrifar
Reynir Þór Stefánsson kom að sjö mörkum hjá Melsungen í kvöld
Reynir Þór Stefánsson kom að sjö mörkum hjá Melsungen í kvöld Vísir/getty

Íslendingalið Melsungen tapaði með níu mörkum,34-25, gegn Vardar í Evrópudeildinni í handbolta í kvöld og þarf því að fara í umspil um sæti í átta liða úrslitum. Á sama tíma hafði Kristianstad betur gegn Benfica í Íslendingaslag.

Leikur Melsungen og Vardar var úrslitaleikur um toppsæti þriðja milliriðils og um leið barátta um það hvort liðið færi beint áfram í átta liða úrslit Evrópudeildarinnar. Þar reyndist lið Vardar hlutskarpara og vann að lokum níu marka sigur. 

Reynir Þór Stefánsson, sem var á dögunum valinn í íslenska landsliðið fyrir komandi leiki liðsins gegn Svíþjóð, kom að sjö mörkum fyrir Melsungen í kvöld. Reynir skoraði fjögur mörk og lagði upp þrjú. Arnar Freyr Arnarsson skoraði á sama tíma tvö mörk fyrir þýska liðið sem fer í umspilið um sæti í átta liða úrslitunum. 

Í sama riðli hafði Kristianstad betur gegn Benfica með átta mörkum, 30-22, í Íslendingaslag. Einar Bragi Aðalsteinsson átti fínan leik í liði Kristianstad og skoraði fjögur mörk í kvöld. Stiven Tobar Valencia skoraði tvö mörk fyrir Benfica og lagði upp eitt. 

Með sigrinum tryggði Kristianstad sér sæti í umspili fyrir átta liða úrslitin en Benfica endar á botni riðilsins og er úr leik. 




Fleiri fréttir

Sjá meira


×