Skoruðu tvö á síðustu mínútu og fóru upp fyrir Hauka

FH-ingar voru án þjálfarans Sigursteins Arndal vegna leikbanns sem hann fékk eftir bikarleikinn við Hauka í síðustu viku, og var aðstoðarþjálfarinn Aron Pálmarsson því við stjórnvölinn ásamt Einari Andra Einarssyni.

Leikurinn var jafn og spennandi allan tímann en Afturelding komst þó í 24-21 um miðjan seinni hálfleik. Á lokamínútunum skiptust liðin hins vegar á að vera yfir og komst Afturelding í 29-28 þegar mínúta var eftir.

Garðar Ingi Sindrason rauk þá fram og jafnaði metin og Jakob Martin Ásgeirsson stal svo boltanum og tryggði FH hádramatískan sigur úr hraðaupphlaupi.

Garðar Ingi var markahæstur hjá FH í kvöld með sex mörk en Ihor Kopyshynskyi og Kristján Ottó Hjálmsson markahæstir Aftureldingar með sjö mörk hvor.

FH komst með sigrinum upp fyrir Hauka í 2. sæti, og er með 29 stig eftir 20 leiki. Afturelding er í 5. sæti með 25 stig.

HK skildi Selfoss eftir við fallsvæðið

Sigur HK-inga var öllu öruggari, gegn Selfossi, en honum lauk með sjö marka mun.

Hjörtur Ingi Halldórsson og Ágúst Guðmundsson skoruðu átta mörk hvor fyrir HK en Hákon Garri Gestsson var markahæstur hjá Selfossi með tíu mörk.

HK kom sér þar með í 14 stig í 8. sætinu en Selfoss situr eftir með 11 stig í 10. sæti og gæti misst Stjörnuna upp fyrir sig annað kvöld.