„Ég veit ekki hvað annað ég get gert til að hjálpa hvölunum“

„Ég bara veit ekki hvað annað ég get gert. Lögreglan kom og fór áðan. Nokkrir úr áhöfninni töluðu við mig,“ segir Hólmsteinn í samtali við Vísi um stöðuna og hvort einhver hafi talað við hann frá því hann fór upp. Samkvæmt sjónarvottum er nú unnið að því að losa landfestar. 

Hann segist líklega ekki fara niður nema sjálfviljugur því það sé erfitt að taka menn úr tunnunni. Hann segist ekki vita hvenær það verði eða við hvaða aðstæður. Hólmsteinn skipulagði mótmælin einn. 

Verður dæmdur

Sams konar mótmæli fóru fram sumarið 2023 í aðdraganda þess að hvalveiðiskipin fóru út. Í febrúar á þessu ári voru þær Anahita Babaei og Elissa May Philipps sakfelldar fyrir að brjótast um borð í hvalveiðiskip í mótmælaskyni árið 2023 og dæmdar til 200 þúsund króna sektargreiðslu.

„Ég verð alveg örugglega dæmdur. Ég veit ekki hvað annað er hægt að gera.“

„Það er sorglegt að hér eru menn sem þurfa að fæða fjölskyldu sína og þeir fá borgað fyrir þetta. Hvað annað eiga þeir að gera og hvað annað á ég að gera? Kerfið setur okkur upp á móti hvorum öðrum,“ segir hann.

Hann segist meðvitaður um að mótmæli hans stöðvi líklega ekki skipið heldur tefji það frekar.

„Þetta mun ekki stoppa þetta skip, þegar ég fer þá fer skipið. En ég veit ekki hvað annað ég get gert til að hjálpa hvölunum, sumir gera þetta, aðrir skrifa, aðrir tala. Það er fallegt að allir geri það sem þeir geta,“ segir hann.

Hólmsteinn segist ekki mjög vel undirbúinn til að vera uppi um langa hríð. Hann hafi heyrt af því að skipin færu út í dag og hann hafi því ákveðið að drífa sig af stað. Hann lét engan vita af fjölskyldu sinni og telur að það hefði verið heldur óhjálplegt því þau voru ekki að fara með honum.

„Hjálpumst að við að koma betur fram við allt og alla. Ef það er eitthvað sem ég er að gera sem skaðar aðra þá vil ég hjálp við að stoppa það, ég er mannlegur og geri mistök og geri mér ekki alltaf grein fyrir því að ég er að skaða aðra,“ segir hann og að hann vilji endilega vita ef mótmæli hans skaða aðra.