Netþrjótar herja á „mömmur“ landsins

Svo hljóða svikaskilaboð sem fjöldi Íslendinga hefur fengið frá netþrjótum síðustu daga. 

Þau virðast koma frá íslenskum númerum en líklega eru þau í raun frá útlöndum, að sögn forstöðumanns netöryggissveitarinnar Cert-Is, sem biðlar til fólks að fylgja ekki fyrirmælum netþrjótsins sem þykist vera barn móttakandans.

„Væntanlega eru þeir að gefa upp falskan uppruna þannig að þetta birtist eins og þetta hafi komið frá einhverju númeri sem er íslenskt þegar þetta kemur í rauninni í útlöndum,“ segir Guðmundur Arnar Sigmundsson hjá Cert-Is í samtali við Vísi.

Blaðamanni hefur borist fjöldi ábendinga um skilaboð af þessu tagi, stundum að því er virðist frá sama númerinu. Svo reyndist blaðamaður sjálfur fá slíka sendingu í pósthólfið.

Heilagi sannleikurinn ekki í SMS

„Þeir eru bara að reyna að fá þig til að halda að þú sért að tala við fólk sem er þér nákomið. Svo reyna þeir að fá fólk til að auðkenna sig inn á þjónustur til að komast yfir gögn eða langoftast peninga og fjármagn,“ bætir Guðmundur við.

Hann segir að fólk verði að sýna „heilbrigða tortryggni“ þegar það fær grunsamleg skilaboð.

„Ef það er eitthvað sem örlítið er á gráu svæði, eða eins og núna þar sem fólk þykist vera komið með nýtt númer, þá á maður bara að taka upp símann og hringja í viðkomandi og fá það á hreint hvort þetta sé sannarlega það sem verið var að reyna,“ segir Guðmundur enn fremur.

„Aldrei ganga út frá því að taka textaskilaboðum sem heilögum sannleik.“

Finna númerin ýmist í gagnalekum eða á opinberum síðum

Hann segir að það sé allur gangur á því hvernig netþrjótar komist í símanúmer fólks. Yfirleitt gerist það í gegnum gagnaleka en einnig gangi símaskrár manna á milli á „dark web“, sum sé í myrkustu hornum netheima.

En oft eru símanúmer líka opinber.

„Stundum er bara verið að nýta sér símanúmer sem eru opin á Internetinu. Stundum er þetta skráð á heimasíðum, eða bara já.is.“