Hand­tekin fyrir að lemja kærastann en hann vildi ekki kæra

Sha‘Carri vann silfur og gull á Ólympíuleikunum í París á síðasta ári en hefur lítið keppt undanfarna mánuði.

Hún var hins vegar á leiðinni á mót síðasta sunnudag með kærasta sínum, spretthlauparanum Christian Coleman, þegar hún var handtekin fyrir að beita hann ofbeldi.

Samkvæmt lögregluskýrslu lentu þau í rifrildi og Sha‘Carri ýtti við kærastanum, sem reyndi að labba í burtu. Hún elti hann og hélt áfram að slá til hans þangað til hún var handtekin á vettvangi fyrir fjórða stigs heimilisofbeldi.

The Athletic fjallar um málið en hlaupasíðan Letsrun.com greindi fyrst frá.

Sha‘Carri var í gæsluvarðhaldi næstu nítján klukkutímana en var síðan sleppt og hreinsuð af öllum ásökunum vegna þess að kærastinn neitaði að leggja fram kæru og „vildi ekki vera fórnarlamb,“ samkvæmt sömu lögregluskýrslu.

Þau fóru síðan bæði til Oregon og kepptu síðasta fimmtudag í undanrásum. Sha‘Carri komst í úrslit en ákvað að keppa ekki þar vegna þess að hún er nú þegar búin að tryggja sér sæti á HM á næsta ári.

Frjálsíþróttasamband Bandaríkjanna er meðvitað um málið en mun ekki tjá sig um það, samkvæmt ESPN.