Tjáir sig ekki um á­kæru: „Ég ætla að skoða þetta“

Einnig mun Bassi hafa hótað því að drepa leigubílstjórann, ef sá léti hann ekki hafa símann sinn aftur. Þetta var í febrúar 2023.

Í frétt Mannlífs, sem hefur ákæruna undir höndum, segir að leigubílstjórinn hafi tognað á hálsi, fengið blæðingu undir slímhúð hægra auga, bitför og verið marinn.

Bassi var ákærður fyrir líkamsárás og vörslu fíkniefna. Leigubílstjórinn hefur krafist rúmrar einnar og hálfrar milljónar króna, auk vaxta, í skaðabætur.

„Takk fyrir að láta mig vita“

Þegar blaðamaður Vísis náði tali af honum fyrr í dag virtist Bassi koma af fjöllum.

„Nú? Hinkraðu augnablik. Ég ætla að skoða þetta. Takk fyrir að láta mig vita!“ sagði Bassi og skellti á.

Svo þegar aftur náðist í hann sagðist hann upptekinn og vildi ekki tjá sig um málið.

Rifust um gjald og síma

Í frétt DV, sem byggir einnig á ákærunni og lögregluskýrslu, kemur fram að upptaka úr eftirlitsvél í leigubílnum sýni ekki snúru sem Bassi á að hafa vafið um háls leigubílstjórans. Þá sýnir upptakan að Bassi skipi bílstjóranum ítrekað að skila sér síma.

Bassi hafði fengið far úr miðbænum í Bryggjuhverfi, með einu stoppi, og fannst honum þær fjórtán þúsund krónur sem leigubílstjórinn fór fram á of mikið. Þá fór hann úr bílnum án þess að borga og sagðist ætla að sækja vin sinn og fá hann til að borga fargjaldið.

Þá mun leigubílstjórinn hafa hlaupið út á eftir Bassa og tekið af honum símann.