Lykil­at­riði að ræða við börnin og halda sig við stað­reyndir

Kolfinna Eldey Sigurðardóttir var nemandi í 5. bekk Rimaskóla í Grafarvogi í Reykjavík. Faðir hennar hringdi í Neyðarlínuna um kvöldmatarleytið á sunnudaginn og tilkynnti um andlát dóttur sinnar. Lögreglan mætti á svæðið, fann dótturina látna og handtók föðurinn. Hann sætir gæsluvarðhaldi og segist lögregla vera komin með ágæta mynd af atburðum.

Þóranna Rósa Ólafsdóttir skólastjóri Rimaskóla sendi foreldrum og forráðamönnum allra barna við skólann tölvupóst í morgun til að lýsa hvernig brugðist hafi verið við þessu erfiða máli. Pósturinn er sendur fyrir hönd stjórnenda og áfallateymis Rimaskóla í þeim tilgangi að halda foreldrum upplýstum um hvernig áfallateymið hefði brugðist við gagnvart nemendum og aðstæðum í skólastarfinu.

Haldinn var fundur með nemendum og foreldrum þeirra í 5. bekk í sal skólans í morgun. Þar hafi verið farið yfir málið og staðreyndir þess. Teymið horfi til upplýsingar sem lögregla hafi gefið. Mikilvægt sé að umræðan fari ekki út í ýmsar pælingar sem verið hafi í samfélaginu.

Halda sig við staðreyndir

„Við getum ekki farið í að meta málin út frá getgátum heldur staðreyndum frá þeim sem rannsaka málið,“ segir í skilaboðum til forráðamanna Rimaskóla.

Eftir fundinn með fimmta bekk hafi hópar farið í bekki og rætt við alla nemendur skólans. Í hópunum voru meðal annars prestar, ráðgjafar, aðilar frá Rauða kross og stjórnendur Rimaskóla.

„Rætt var um tilfinningar og hvernig við getum haldið utan um hvert annað. Farið var yfir staðreyndir sem við vitum. Við ræddum um mikilvægi þess að viðra ekki málin á samfélagsmiðlum eða taka þátt í umræðu á þeim vettvangi. Okkar væri að hlúa að okkur og hugsa til fjölskyldu stúlkunnar. Við hvetjum foreldra að ræða mjög varlega um þetta mál, þær sögur sem eru í gangi, við börnin sín.“

Má búast við að spurningar vakni

Nemendum á eldri stigum hafi verið boðið að ræða við ráðgjafa frá Austurmiðstöð. Þar er að finna sálfræðinga, félagsráðgjafa, unglingaráðgjafa og hegðunarráðgjafa ásamt aðilum frá áfallateymi Rauða krossins. Einnig hafi þessir aðilar verið til taks fyrir foreldra sem leituðu eftir aðstoð í skólanum.

„Næstu daga má búast við að margar spurningar vakni og margvíslegar tilfinningar komi fram. Við vitum að sumir af okkar nemendahópi hafa misst náinn aðstandenda. Einnig hafa aðilar innan okkar hóps gengið í gegnum margvíslega reynslu eins og ofbeldi eða missi á einhvern hátt. Allar þessar tilfinningar geta komið upp og þá þurfum við, foreldrar og starfsfólk skólans, að vera viðbúið að hlusta, ræða málin og hlúa að nemendum okkar og hvert öðru.“

Sérfræðingar hjá Austurmiðstöð gefi þau ráð til foreldra að lykilatriði sé að taka samtalið við börn sín þegar málið komi upp. Þar sé mikilvægt að halda sig við staðreyndir málsins.

„Við skulum ekki forðast að ræða málin heldur hlustum á barnið og svörum þeim spurningum sem við getum. Lofum samtalinu að flæða og að barnið fái að stýra hvert samtalið fer.“

Þá er vísað á gott efni á vef Sorgarmiðstöðvar sem foreldrar geti nýtt sér í samtölum og stuðningi við barnið sitt. Sjá hér.

Einnig eru góðar upplýsingar á vef Rauða krossins varðandi sálræna áfallahjálp og hana er að finna á fjöldamörgum tungumálum. Sjá hér. 

Þá er bent á bókina „Börn og sorg“.