„Við munum ekki eldast saman“

Tómas Þór er einn þeirra sem rætt er við í veglegu blaði Krafts sem gefið var út á dögunum í tilefni af 25 ára afmæli félagsins.

Tók hlutverk sitt alvarlega

Leiðir þeirra Tómasar Þórs og Sunnu Kristínar lágu saman fyrir áratug, þegar þau hófu bæði störf hjá 365 miðlum og drógu þau sig síðan saman, hægt og rólega. 

Tómas Þór opnaði sig um árið um mikil stakkaskipti í lífinu eftir að hafa gengist undir magaskiptaaðgerð árið 2015. Hann gat farið til útlanda, hvort sem er í vinnu- eða skemmtiferðir, og fann ástina. Lífið var orðið mun betra og ástin meira að segja fundin.

Þar sem Sunna Kristín og Tómas Þór voru bæði komin yfir þrítugt þá byrjuðu þau tiltölulega fljótt að ræða barneignir og leituðu seinna meir aðstoðar hjá Livio. Ferlið hjá Livio átti hins vegar eftir að taka óvænta stefnu og kollvarpa lífi parsins. Blóðprufur sem teknar voru úr Sunnu vöktu grunsemdir starfsmanns Livio sem hafði frumkvæði að því að sýnið yrði tekið til frekari rannsókna. 

Um viku síðar kom í ljós að Sunna var með mergæxli á gríðarlega háu stigi.

Tómas Þór rifjar hann upp hræðsluna sem heltók þau á sínum tíma.

„Sumt af þessu er eitthvað svartnætti sem maður er bara búinn að gleyma viljandi. Það er búið að segja þér úrslitin en maður vonast eftir því að þetta verði eins og í skaupinu ‘85, bara bíður eftir endursýningu og þá verði skotið framhjá.“

Tómas Þór lýsir því einnig hvernig það kom í hans hlut að skýra hlutina fyrir fólkinu í kringum þau. Hann segist hafa tekið hlutverkinu alvarlega, hann svaraði öllum og gaf skýrslu um hvernig allt væri.

„Hitt kemur svona af sjálfu sér. Maður reynir að hafa allt eins þægilegt og hægt er að hafa í kringum hana, reynir að segja einhverja brandara á réttum tímapunktum. Ást og umhyggja og eitthvað grín og reyna að hafa þetta kósí, veit ekki hvort það er hægt að gera eitthvað mikið meira.“

Hann bætir við á öðrum stað að þegar útlitið sé ekki sem bjartast þá verði grínið og húmorinn stundum svartari.

„Það verður svona óhjákvæmilegt að hann verður eitthvað svartari, hvað ætlaru að gera þegar ég fer, ég mun vera hér og vaka yfir þér og eitthvað svona grín. Þú þarft að breytast í einhvers konar faðmlag.“

Óvissan er verst

Mein Sunnu er sem fyrr segir ólæknandi. Lyf við þessu tiltekna meini hafa engu að síður verið í mikilli þróun síðustu ár.

„Ég er með unnustu sem samkvæmt læknavísindunum verður … Við munum ekki eldast saman. Það er það erfiðasta sem ég get sagt. Ég reyni að hugsa eins lítið um það og ég mögulega get,“ segir Tómas Þór.

Að hans sögn er sjúkdómurinn „rétt fyrir ofan núllið“ hjá Sunnu eins og er og er „alltaf aðeins að láta vita af sér.“

Óvissan er mikil hvað varðar framtíðina en parið lifir fyrir daginn í dag.

„Við vitum ekki hvort það séu tvö ár, fimm ár eða tíu ár áður en hann kemur aftur. Það er það ógeðslega við þetta. Þegar þú ert með svona sjúkdóm þá verðurðu bara að lifa núna, það er ekki annað hægt.“

Sunna Kristín sagði frá áfallinu við að greinast með krabbamein og baráttunni fyrir lífi sínu í viðtali við Ísland í dag árið 2022.