Á­minning um að plastið drepi

Þetta kemur fram í svari Um­hverfis­stofnunar við fyrir­spurn Vísis. Frétta­stofu barst mynd frá á­hyggju­fullum íbúa á Álfta­nesi af mávi sem lent hefur í ó­göngum vegna plastrusls. Í­búinn segir um að ræða á­minningu um það að plastið drepi og sé til trafala í líf­ríkinu.

Magn heimilis­úr­gangs að aukast ár frá ári

Um­hverfis­stofnun hefur ekki borist til­kynning um tjéðan máv, að því er segir í svörum frá stofnunni. Mála­flokkurinn sé ekki innan starf­semi stofnunarinnar en samt berist henni öðru hverju á­bendingar um villt dýr í hremmingum sem skráðar eru í skjala­kerfi stofnunarinnar og þær sendar á­fram til við­eig­andi aðila.

Stofnunin safni hins­vegar ekki á­bendingum á kerfis­bundinn hátt þannig að auð­velt sé að fá yfir­sýn yfir þær. Á­bendingum hafi verið komið til lög­reglunnar á höfuð­borgar­svæðinu og til Garða­bæjar vegna að­gerða sem gæti þurft að grípa til svo hægt sé að losa plastið af fuglinum.

„Magn heimilis­úr­gangs á Ís­landi hefur verið að aukast ár frá ári en það er erfitt að segja til um hvort á­sókn dýra í úr­ganginn sé að aukast. Ein­hverjir mávar verpa í Garða­bæ en flestir mávarnir á Höfuð­borgar­svæðinu eiga hingað lítið erindi inn í byggð annað en að gramsa eftir fæðu í að­gengi­legu rusli bæjar­búa. Yfir­fullar rusla­tunnur og matar­af­gangar eru sér­stak­lega freistandi fyrir mávana.“

Hægt að koma í veg fyrir að mönnum og mávum lendi saman

Í svörum stofnunarinnar segir að með því að lands­menn gangi vel frá rusla­tunnum og passi að matar­af­gangar séu ekki skildir eftir úti, til dæmis eftir garð­veislur, sé hægt að koma í veg fyrir að mönnum og mávum lendi saman.

„Og því betur sem við göngum um, því færri verða til­vikin um að villt dýr lendi í hremmingum vegna ná­býlisins við okkur. Þetta til­vik undir­strikar mikil­vægi þess að við komum úr­ganginum okkar í réttan far­veg.“

Mávurinn með plast­draslið á goggnum undir­striki mikil­vægi þess að lands­menn komi úr­gangi sínum í réttan far­veg. Ný­lega hafi verið inn­leitt bann við þeim ein­nota plast­vörum sem lík­legast eru til að stefna villtum dýrum í hættu, líkt og ein­nota hnífa­pörum, rörum og plast­burðar­pokum.

Plastið safnist upp

„Á sama tíma voru settar hertar reglur um notkun ein­nota plast­um­búða eins og drykkjar­mála, eins og það sem þessi mávur virðist hafa náð að troða á gogginn á sér. Plast brotnar yfir­leitt ekki niður í náttúrunni, eða það gerist mjög hægt.“

Plastið safnist þess vegna upp og sýna rann­sóknir Um­hverfis­stofnunar og Náttúru­stofu Norð­austur­lands að stór hluti fýla við Ís­lands­strendur eru með plast í maganum, að því er segir í svörum stofnunarinnar.

„Eins og þessi mávur sýnir okkur, þá eru dýr lunkin við að koma sér í vand­ræði. Við getum tekið þessu sem á­minningu um að ganga vel frá úr­gangi og að minnka notkun á ó­þarfa plasti eftir bestu getu.“