Útgerðin fái reikninginn ekki skattgreiðendur

Stjórnarandstaðan gagnrýndi ríkisstjórnina fyrir skort á samráði um aðgerðir á Alþingi í dag. Nýr þingmaður Viðreisnar tók sæti á þingi í fyrsta sinn. Þá segja ráðherrar að ríkið muni grípa til fullra varna gegn kröfum útgerðarfyrirtækja um bætur vegna úthlutunar veiðiheimilda á makríl en forsætisráðherra vill að fyrirtækin dragi kröfurnar til baka.

Þorbjörg Sigríður Gunnlaugsdóttir sór drengskaparheit að stjórnarskránni á Alþingi í dag en hún tekur við sæti af Þorsteini Víglundssyni sem hefur afsalað sér þingmennsku. Þetta var í fyrsta sinn í tæpar tvær vikur sem Alþingi kemur saman og voru tvö mál á dagskrá.

Forsætisráðherra flutti fyrst munnlega skýrslu um viðbrögð stjórnvalda vegna Covid-19 og fóru fram umræður um hana. Þá samþykkti þingið frumvarp um breytingar á lögum um framboð og kjör forseta Íslands sem heimilar þeim sem huga á framboð til forseta að safna meðmælum með framboði sínu með rafrænum hætt en ákvæðið er til bráðabirgða vegna kórónuveirufaraldursins.

Kalla eftir auknu samráði um aðgerðir

Þingmenn stjórnarandstöðunnar bentu margir á að andstaðan hafi til þessa stutt allar tillögur ríkisstjórnarinnar um aðgerðir. Aftur á móti hafi engin tillaga stjórnarandstöðunnar verið samþykkt. „En ef mönnum er alvara með tali um mikilvægi þess að standa öll saman og að þingið vinni saman þá hljóti sú samstaða og sú samvinna að virka í báðar áttir. Ég vona að það verði breyting þar á og samstöðu og samvinnutalið birtist hér í þinginu í raun,“ sagði Sigmundur Davíð Gunnlaugsson, formaður Miðflokksins.

Logi Einarsson, formaður Samfylkingarinnar tók í svipaðan streng hvað þetta varðar. „Ríkisstjórnin vill halda spilunum þétt að sjálfri sér og aðkoma stjórnarandstöðuflokka á að einskorðast við þinglega meðferð mála, hún kemur ekki að undirbúningi aðgerða,“ sagði Logi meðal annars.

Þórhildur Sunna Ævarsdóttir kallaði jafnframt eftir auknu samráði við stjórnarandstöðuna. „Ég er að spyrja fyrir þá þúsundir kjósenda sem treystu mér og öðrum þingmönnum stjórnarandstöðunnar til þess að starfa á Alþingi, til þess að fylgjast með ríkisstjórn sem vinnur nú að mestu í lokuðum herberjum og vísar í lágmarks lýðræðislega ferla um nefndastarf til þess að skreyta sig stolnum fjöðrum samráðs. Það er ekki ásættanlegt forseti,“ sagði Þórhildur Sunna.

Ráðherrar ómyrkir í máli um kröfur útgerðarfélaganna

Krafa útgerðarfélaga á hendur ríkinu um bætur vegna úthlutunar heimilda til veiða á makríl barst einnig í tal í umræðum á Alþingi í dag. „Möguleg innbyrðis togstreita um aflaheimildir á milli útgerða verður ekki leyst á kostnað skattgreiðenda,“ sagði Bjarni Benediktsson, fjármála- og efnahagsráðherra.

„Nú höfum við tekið til varna í þessu svokallaða makrílmáli. Við munum taka til fullra varna og ég hef reyndar bara góðar væntingar um að við munum hafa sigur í því máli. En ef svo ólíklega vill til að það mál fari ríkinu í óhag þá er það einfalt mál í mínum huga að reikningurinn vegna þess verður ekki sendur á skattgreiðendur. Reikningurinn vegna þess verður að koma frá greininni, það er bara svo einfalt,“ segir Bjarni.

Katrín Jakobsdóttir tók í svipaðan streng og sagðist verða reið yfir framgangi fyrirtækjanna. „Þó að ég telji að ríkiðhafi góðan málstaðí þessu máli þá finnst mér eðlilegt að þessi fyrirtæki íhugi að draga þessar kröfur til baka,“ sagði Katrín.