Bjarni: Á von á því að Hólmbert verði klár fyrir laugardaginn

Bjarni Guðjónsson, þjálfari KR, gerir ráð fyrir að geta notað framherjann Hólmbert Aron Friðjónsson í bikarúrslitaleiknum gegn Val á laugardaginn.

Hólmbert, sem kom til KR frá Celtic í félagaskiptaglugganum, fór meiddur af velli eftir 36 mínútna leik í 2-0 sigrinum á Fylki á mánudaginn og síðan hefur ríkt óvissa með þátttöku hans í úrslitaleiknum gegn Val á laugardaginn.

„Hann tók þátt í hluta af æfingunni nú í hádeginu og ég á von á því að hann verði klár fyrir laugardaginn,“ sagði Bjarni á fundi sem var haldinn vegna bikarúrslitaleiksins í höfuðstöðvum KSÍ í dag.

Þetta eru góðar fréttir fyrir KR-inga en Hólmbert hefur komið sterkur inn í lið Vesturbæinga og skorað fjögur mörk í fimm leikjum fyrir KR í deild og bikar.

Hólmbert hefur einu sinni áður tekið þátt í bikarúrslitaleik. Það var fyrir tveimur árum þegar hann var leikmaður Fram en Safamýrarpiltar unnu þá dramatískan sigur á Stjörnunni eftir vítaspyrnukeppni. Hólmbert skoraði í leiknum sjálfum og úr sinni spyrnu í vítaspyrnukeppninni.