Tollar kísilframleiðslu í Kína

Howard Lutnick, viðskiptaráðherra Bandaríkjanna, sagði að með þessum tollum myndi birgðakeðjan fyrir framleiðslu sólarrafhlaðna og hálfleiðara, sem eru notaðir í alls konar tölvubúnað, færast til Bandaríkjanna.

„Við erum með iðnaðinn hér, hann er of smár og hann mun springa út,“ sagði Lutnick samkvæmt Politico.

Forsvarsmenn bandarískra fyrirtækja sem framleiða sólarrafhlöður hafa sakað samkeppnisaðila þeirra í Kína um að fá ósanngjarnan stuðning frá ríkinu og þannig dæla miklu magni af ódýrum rafhlöðum á markaðinn.

Tilskipun forsetans um tollana snýst að mestu um hálfleiðara en ekki sólarrafhlöður, sem Trump hefur ítrekað gagnrýnt harðlega. Sérstaklega er tekið fram að getan til að framleiða kísilafurðir sé mikilvægur grunnur í iðnaðarframleiðslu og hergagnaframleiðslu.

Reuters segir þó að hálfleiðaraframleiðsla heimsins noti eingöngu um 2,4 prósent af framleiðslu heimsins á fjölkristölluðum kísli (Polysilicon). Langmest fer í framleiðslu sólarrafhlaðna. Kínverjar eru nánast allsráðandi á þessum markaði.

Tilskipuninni fylgir ákvæði um að viðskiptaráðuneytið geti aðstoðað og hvatt bandarísk fyrirtæki til að auka framleiðslu þar í landi.

Ríkisstjórn Trumps hefur að undanförnu þurft að endurgreiða bandarískum fyrirtækjum milljarða dala eftir að Hæstiréttur Bandaríkjanna komst að þeirri niðurstöðu að stór hluti þeirra tolla sem Trump hefur beitt frá því hann tók aftur við embætti væru ólöglegir.