Kallaði Michelle Obama karl­mann á af­mælis­hátíð Trump

Bardagakeppni var slegið upp á suðurbletti Hvíta hússins í gærkvöldi. Tilefnið var áttræðisafmæli Trump forseta og að nafninu til 250 ára afmæli Bandaríkjanna í næsta mánuði.

Viðburðurinn er að mörgu leyti sagður hafa líkst einum af kosningafundum Trump. Áhorfendur kyrjuðu „U-S-A“ allt kvöldið og kanadískur keppandi fékk að heyra að Kanada væri 51. ríki Bandaríkjanna. Trump hefur ítrekað haldið því fram að Bandaríkin ættu að innlima Kanada.

Svartur blettur á samkomunni voru ummæli Josh Hokit, bandarísks keppanda í þungavikt, sem sagði „Og að lokum, Michelle Obama er karlmaður, er það ekki rétt, Bandaríkin?“ í viðtali við Joe Rogan, hlaðvarpsstjórnanda, að bardaga loknum.

Bandarískir repúblikanar hafa um árabil haldið á lofti stoðlausri samsæriskenningu um að Michelle Obama, eiginkona Baracks Obama fyrrverandi forseta, sé í raun og veru karlmaður.

Ummælin voru send út í beinu streymi á efnisveitunni Paramount+. Hún er í eigu David Ellison, auðkýfings og bandamanns Trump, sem sölsar nú undir sig helstu fjölmiðlasamsteypur Bandaríkjanna.

UFC-bardagamótaröðin virðist aftur á móti hafa klippt ummælin út úr viðtalinu í útgáfu sem hún birti á Youtube-rás sinni eftir bardagann.