Sam­fylkingin og ríkis­stjórnin lækka flugið

Fylgi Samfylkingarinnar minnkar um tæplega þrjú prósentustig og fer úr 31,2% í 28,5%. Samhliða eykst fylgi Framsóknarflokksins og Vinstrihreyfingarinnar – græns framboðs um sitt hvort prósentustigið. Litlar breytingar eru á stuðningi við aðra flokka milli mánaða og eru þær ekki tölfræðilega marktækar.

Næstum 52% þeirra sem taka afstöðu segjast styðja ríkisstjórnina sem eru 2,4 prósentustigum færri en í janúarmælingunni. Fleiri styðja ríkisstjórnina en ríkisstjórnarflokkana þrjá samanlagt. Athygli vekur að nokkuð færri mældust ánægðir með störf ríkisstjórnarinnar í nýlegri könnun Prósents þar sem talan var 37%.

Vinstri græn teygja sig nær fimm prósenta markinu

Könnun Gallup fór fram dagana 2. febrúar til 1. mars og greint er frá niðurstöðunum í tilkynningu frá fyrirtækinu. Í könnuninni mældist Samfylkingin með tæp 29% líkt og áður segir en næst á eftir fylgja Miðflokkurinn með rúm 20% og Sjálfstæðisflokkurinn með um 18% fylgi. 

Um 11% myndu kjósa Viðreisn, tæplega 7% Framsóknarflokkinn, nær 6% Flokk fólksins, rúmlega 4% Vinstri græn, næstum 3% Pírata og rösklega 2% Sósíalistaflokk Íslands. Nærri 7% myndu skila auðu eða ekki kjósa og tæplega 14% taka ekki afstöðu eða vilja ekki gefa hana upp.

Samfylkingin mældist með 34,7% fylgi í Þjóðarpúlsi Gallup í júlí 2025 og hefur stuðningurinn nú minnkað um sex prósentustig.

Niðurstöðurnar eru úr netkönnun sem Gallup gerði á landsvísu og voru einstaklingar í úrtaki handahófsvaldir úr Viðhorfahópi Gallup. Heildarúrtaksstærð var 9.958 og þátttökuhlutfall 44,3%. Vikmörk á fylgi flokka eru 0,5% til 1,5%.

Spurningarnar voru eftirfarandi: 1) Ef kosið yrði til Alþingis í dag, hvaða flokk myndir þú kjósa? 2) En hvaða flokkur yrði líklegast fyrir valinu? 3) Styður þú ríkisstjórnina?