Sagður hafa skipað hernum að gera á­rásir í Venesúela

Maduro hefur verið ákærður af Bandaríkjamönnum fyrir fíkniefnasmygl og hryðjuverkastarfsemi og er hann sakaður um að stýra glæpasamtökum sem koma að því að smygla fíkniefnum til Bandaríkjanna.

Umtalsverður herafli hefur verið sendur til Karíbahafsins, þar sem árásir hafa verið gerðar á báta sem Bandaríkjamenn hafa sagt notaða til að smygla fíkniefnum. Trump hefur þar að auki gefið til kynna að hann gæti skipað hernum að gera árásir í Venesúela.

Samkvæmt heimildarmönnum Miami Herald gætu árásirnar hafist á næstu klukkustundum eða næstu dögum.

Ósannaðar ásakanir

Miðillinn hefur eftir heimildarmönnum sínum að árásunum yrði ætlað að skera höfuðið af Cartel de los Soles, glæpasamtökunum sem Maduro og aðrir í ríkisstjórn hans eru sakaðir um að stýra. Þessi samtök eru sögð smygla um fimm hundruð tonnum af kókaíni til Bandaríkjanna og Evrópu á ári hverju.

Venesúela hefur um langt skeið verið viðkomustaður kókaíns frá Kólumbíu sem flutt hefur verið til Bandaríkjanna og til Evrópu. Samtökin eru sögð vinna innan hers Venesúela og í samstarfi við önnur glæpasamtök eins og Tren de Aragua í Venesúela og Sinaloa-samtökin í Mexíkó.

Bandaríkjamenn hafa ekki fært sannanir fyrir þessum ásökunum sínum. Háttsettir menn í her og stjórnmálum Venesúela hafa ítrekað í gegnum árin verið bendlaðir við fíkniefnasmygl og framleiðslu.

Í samtali við El País segja sérfræðingar að ekki sé endilega um glæpasamtök að ræða, þó margir ráðamenn í Venesúela stundi glæpastarfsemi.

Sagði að tími Maduros væri liðinn

Heimildarmenn Herald vildu ekki segja til um hvort árásirnar myndu beinast beint að Maduro en einn þeirra sagði að tími forsetans væri liðinn. Hann sagði Maduro í erfiðri stöðu og að nokkrir herforingjar hefðu sagst tilbúnir til að handsama hann og senda til Bandaríkjanna.

Aðrir miðlar vestanhafs hafa enn sem komið er ekki staðfest frétt Herald og er vert að benda á að Pete Hegseth, varnarmálaráðherra, er erlendis. Þá eru nokkrir dagar í flugmóðurskipið USS Gerald Ford verður komið til Karíbahafsins.

Wall Street Journal sló þó á svipaða strengi og Herald í gærkvöldi. Þá var sagt frá því í gærkvöldi að búið væri að ákveða hvaða skotmörk ráðast ætti á í Venesúela, ef og þá þegar sú ákvörðun að gera árásir yrði tekin.

Þegar frétt WSJ var birt í gær kom þar fram að Trump hefði ekki tekið þá ákvörðun að hefja árásir en að undirbúningur væri langt á veg kominn. Þá segir miðillinn að Trump og hans helstu ráðgjafar séu þeirrar skoðunar að árásir myndu sannfæra Maduro um að stíga til hliðar.

 Sagði árásirnar óásættanlegar

Yfirmaður mannréttindamála hjá Sameinuðu þjóðunum, Volker Türk, sagði í morgun að árásir Bandaríkjamanna á báta á Karíbahafi væru óásættanlegar. Hætta þyrfti þessum árásum og sagði hann einnig að Sameinuðu þjóðirnar þyrftu að taka þær til rannsóknar.

Hann sagði að líklega væru árásinar brot á alþjóðasamþykktum varðandi mannréttindi, enda væri verið að drepa fólk án dóms og laga.

Fréttin hefur verið uppfærð.