Flug­um­ferðar­stjórar af­lýsa vinnu­stöðvunum á morgun og laugar­dag

Þetta staðfestir Arnar Hjálmsson, formaður Félags íslenskra flugumferðarstjóra, í samtali við fréttastofu. Þetta er í þriðja skipti sem flugumferðarstjórar aflýsa vinnustöðvun í yfirstandandi kjaradeilu en hluti þeirra lagði niður störf síðasta sunnudag. 

Síðast í gær var tilkynnt að búið væri að aflýsa fyrirhugaðri vinnustöðvun í dag sem hefði að óbreyttu haft áhrif á tugi flugferða til og frá Keflavíkurflugvelli. Engar frekari vinnustöðvanir hafa verið boðaðar eftir laugardag.

Ekki enn náð lendingu

Fulltrúar Félags íslenskra flugumferðarstjóra funduðu með Samtökum atvinnulífsins í húsakynnum Ríkissáttasemjara frá klukkan 10 í morgun og var fundi þeirra slitið rúmum 12 tímum síðar. Arnar segir enn mikið verk fyrir höndum og engin skýr lausn í sjónmáli. 

„Við erum búin að aflýsa þessum tveimur vinnustöðvunum sem áttu að vera um helgina til að reyna að halda áfram að setja einhverja slóð. Við erum ekki búin að finna hana enn þá. Við héldum að við værum komin eitthvað áleiðis í dag en það gekk ekki á endanum.“ Það hafi strandað seint í kvöld. 

Skoða enn tengingar við launaþróun

„Við þurfum bara að setjast niður í fyrramálið og hugsa þetta upp á nýtt aðeins, beggja megin borðsins og sjá hvert það leiðir okkur,“ bætir Arnar við. 

Áfram sé reynt að finna útfærslu á launaliðnum og tengingu við launaþróun sem henti báðum aðilum. Til að mynda sé rætt hvort styðjast eigi við fastar hækkanir, einhvers konar tryggingu eða blöndu af hvoru tveggja. Arnar segir þau ekki enn hafa fundist leið sem báðir samningsaðilar geti sætt sig við. 

„En við höldum áfram,“ segir Arnar að lokum sem var orðinn þreyttur eftir tólf tíma fundarlotu dagsins.

Fréttin hefur verið uppfærð.