Líf og fjör í Reyk­holti í Borgar­firði um helgina á Reykholtshátíð

Reykholtshátíð hófst í gær og stendur fram á sunnudagskvöld. Dagskrá helgarinnar er mjög fjölbreytt með fjölbreyttum hópi flytjenda.

Sigurður Bjarki Gunnarsson er annar af listrænum stjórnendum hátíðarinnar og veit því nákvæmlega um allt, sem gerist í Reykholti um helgina. En hvað er um að vera í dag, laugardag?

„Það er fyrirlesturinn hans Garðars Halldórssonar, sem byrjar klukkan 13:00 og svo eru kórtónleikar klukkan 15:00, Cantoque Semble, fyrsta flokks kammerkór úr Reykjavík og síðan eru kammertónleikar í kvöld klukkan 20:00 með prógrammi frá 20. öld, sem er orðin svona klassík í dag,” segir Sigurður.

Sigurður Bjarki segir að á morgun munu nánast allir flytjendur hátíðarinnar koma fram í fjölbreyttri lokatónleikadagskrá.

„Já, þá er hátíðarmessa klukkan 14:00 og þar er tónlistarflutningur og svo eru lokatónleikar hátíðarinnar klukkan 16:00 þar sem allir flytjendurnir koma fram nema kórinn og svo er bara veisla og keyrt í bæinn,” segir Sigurður alsæll með hátíðina og hvað hún fer vel af stað.

Tjaldsvæðið er rétt við Reykholt þannig að Sigurður hvetur fólk til að koma á svæðið á húsbílunum sínum, hjólhýsunum eða jafnvel með tjaldvagninn eða tjaldið og njóta dagskrár Reykholtshátíðar í leiðinni, það verði engin svikin af því.

Er eitthvað að lokum, sem þú vilt koma á framfæri ?

„Nei, bara hvetja alla til að taka sér bíltúr í sveitina og gera sér glaðan dag í Borgarfirðinum,” segir Sigurður.

Um hátíðina og dagskrá hennar