„Ekki mistök“ að brauð með engu kostaði tvö þúsund krónur

Sólrún Dögg Jósefsdóttir skrifar 24. júlí 2025 18:58

Sumir kjósa að fylla samlokur sínar af áleggi og sósu en öðrum þykir betra að halda álegginu í lágmarki, jafnvel sleppa því alveg. Myndin er úr safni. Getty

Viðskiptavinur skyndibitastaðarins Subway í Borgarnesi uppgötvaði á dögunum að hann hafði verið rukkaður um 1969 krónur fyrir tólf tommu bát með engu á. Rekstrarstjóri Subway segir ekki um mistök að ræða.

„Fengum okkur öll 6 tommu báta - stútfulla af kjöti og grænmeti. Einhverft barnið gat þó eingöngu borðað eintómt brauð og bað um 12 tommu. Stimplað inn sem Veggie Delite bátur því starfsfólkið vissi ekki hvað annað þau gætu flokkað þetta undir. „Sama verð á bátum hvort sem það er eitthvað á þeim eða ekki,“ var svarið sem ég fékk,“ segir Sigrún Elva Gunnarsdóttir meðlimur í Facebook hópnum Matartips.

Færslan vakti athygli meðlima Matartips. Facebook

Hún veltir því upp hvort það sé mögulega ósanngjarnt fyrir fólk með skyntruflanir að neyðast til að borga sama verð fyrir margfalt minna magn en aðrir.

Fá endurgreitt þrátt fyrir allt

Færslan vakti mikla athygli hópmeðlima, en rúmlega sextíu þúsund manns eru í hópnum. Ekki var einhugur í athugasemdakerfinu um hvernig verðlagið hefði átt að vera. Einhverjir segja verðlagninguna ábyggilega mistök en aðrir segja kaupanda ekki geta gengið að því vísu að fá afslátt kjósi hann að sleppa því að fá sér álegg á Subway-bátinn sinn.

Í skriflegu svari Vilhjálms Sveins Magnússonar rekstrarstjóra Subway á Íslandi segir að keðjan selji því miður ekki stök brauð á öðru verði en verði bátsins grænmetissælu, sem sé þeirra ódýrasta samloka. Á grænmetissælusamloku er ostur, grænmeti og sósur að eigin vali. Verð á slíkri samloku eru 1969 krónur.

„Í þessu tiltekna tilfelli sem vitnað er í er því ekki um mistök að ræða. Í ljósi sérstakra aðstæðna í þessu tilfelli ætlum við að endurgreiða viðskiptavini grænmetissæluna,“ er haft eftir Vilhjálmi.

Neytendur Matur Borgarbyggð Veitingastaðir