Þriggja ára barn ráfaði af leik­skólanum og í Bónus

Móðir barnsins segir í samtali við fréttastofu að henni hafi verið afar brugðið sjálfri en dóttir hennar hafi sem betur fer ekki tekið þetta of nærri sér.

„Ég er á leiðinni að sækja hana um fjögur. Hún er með pláss til hálffimm. Þá hringir nágranni minn og segist hafa séð hana í Bónus. Hún er ein í Bónus og hún er með hana.“

Þegar hún er komin í Bónus er lögreglan mætt vegna þess að viðskiptavinir höfðu hringt. Þar vildi dóttir hennar ekki segja til nafns eða ræða við fólk.

„Ég fór að gráta þegar ég sá hana en hún var nokkuð hress. Hún fór sjálf í Bónus, náði sér í innkaupakerru og keypti sér að versla, og setti í poka í sjálfsafgreiðslukassa og fór út. Þetta er alveg fáránlegt. Bónus er við hliðina á leikskólanum,“ segir móðirin sem ekki vildi koma fram undir nafni til að vernda barnið.

Móðirin fór svo á leikskólann til að ræða við starfsfólkið og leikskólastjórann sem var þá á staðnum. Starfsmaður hafi sagt henni að hann hefði talið að hún væri búin að sækja stelpuna og hefði ekki látið starfsfólkið vita.

„Þau könnuðust ekkert við að hún væri horfin. Lögreglan fór yfir til að ræða við þau og þau vissu ekkert að hún væri horfin. Lögreglan fór i gegnum öryggismyndavélarnar í Bónus og hún sást þar 15:25 og lögreglan mætt á svæðið um 15:43. Sem betur fer var nágranninn minn í Bónus og kannaðist við hana og hringdi í mig rétt fyrir fjögur.“

Hvernig leið þér?

„Alveg ömurlega. Ég var svo stressuð og grét bara þegar ég fékk hana í fangið. Hún á að vera örugg á leikskólanum. Ég var bara heppin að nágranni minn var í Bónus. Annars hefði ég mætt að sækja hana og bara hvar er barnið mitt. Sem betur fer gerðist ekkert fyrir hana. Það er allskonar fólk til og bílar og þungir hlutir.“

Hún segir hliðin á leikskólanum of lág og starfsfólk fylgist ekki nægilega vel með þeim. Þegar leikskólastjórinn mætti hafi hún sagst ætla að fara yfir verklag með foreldrum og ræða við Garðabæ um hliðin. Leikskólinn er einkarekinn og er opinn allt sumarið og því margt sumarstarfsfólk í vinnu.

Alvarlegt mál sem er tilkynnt til barnaverndar

Sævar Guðmundsson aðalvarðstjóri hjá lögreglunni segir málið alvarlegt. Aðkoma lögreglunnar verði ekki meiri en málið hafi verið tilkynnt til barnaverndar.

„Leikskólinn er við hliðina á Bónus í Kauptúninu. Hún hefur komist út og yfir í Bónus. Það hefur líklega einhver gleymt að loka hliði,“ segir Sævar.

Hann segir sem betur fer ekki algengt að lögreglan fari í slík útköll.

„Það er hætta af svona. Lítil börn geta farið út á götu eða sniglast á milli bíla á bílastæðinu. Það eru mörg hundruð bílar þarna á bílastæðinu. Þetta er stórhættulegt og alvarlegt mál. Þetta er ekki gott en slapp vel.“

Fóru yfir verklag með foreldrum og starfsfólki

Ragnheiður Gunnarsdóttir leikskólastjóri á Urriðabóli segir alla starfsmann taka þessu mjög alvarlega og séu miður sín.

„Ég veit ekki hvernig þetta atvikaðist nákvæmlega en líklega hefur hliðið verið opið,“ segir hún og að það gerist reglulega að foreldrar loki ekki. Hún segist í morgun hafa farið ítarlega yfir verklag í leikskólanum með starfsfólki og einnig hafa rætt við foreldra um að loka hliðinu.

„Það eru engar málsbætur fyrir þessu. Auðvitað erum við með verklag um að allir eigi að tékka börnin inn og út. Þetta er mjög leiðinlegt og við tökum þetta mjög inn á okkur. Við höfum farið yfir allt verklag í morgun. Það er sumaropnun og sumarstarfsfólk en það hefur verið hjá okkur síðan í júní þannig þau ættu að þekkja allt verklag. Þetta bara gerist og er alveg hræðilegt.“

Hún segist einnig í morgun hafa haft samband við Garðabæ varðandi hliðin í leikskólanum. Hún vonist til þess að hægt verði að líta á hliðin og hvort hægt sé að loka þeim með öðrum hætti.