Áhrifa­valdur sakaður um að bera á­byrgð á dauða dóttur sinnar

Kate Shemirani starfaði áður sem hjúkrunarfræðingur innan breska opinber heilbrigðiskerfisins en sneri sér síðan að því að auglýsa ýmis konar kukl og fæðubótarefni á samfélagsmiðlum. Þá hefur hún selt ráðgjöf, meðal annars til krabbameinssjúklinga.

Eftir að kórónuveirufaraldurinn hófst árið 2020 dreifði Shemirani alls kyns stoðlausum samsæriskenningum um hann og bóluefnin sem voru þróuð við veirunni. Þar á meðal voru fullyrðingar um að faraldurinn væri gabb, bólusetningar væru skipulögð herferð yfirvalda til þess að drepa fólk og fleira af slíkum toga.

Samsæriskenningaflaumurinn varð til þess að hjúkrunarfræðiráð Bretlands samþykkti að svipta Shemirani starfsleyfi árið 2021. Þá var henni úthýst af samfélagsmiðlum en aðeins tímabundið. Fylgjendahópur hennar hefur vaxið eftir að bæði Facebook og X gáfu upplýsingafalsi lausan tauminn og fylgjast milljónir manna með efni hennar þar, að sögn breska ríkisútvarpsins BBC.

Á samfélagsmiðlunum segir Shemirani fylgjendum sínum að lyfjameðferð við krabbameini sé eins og að dæla „sinnepsgasi“ í æðarnar.

Bein afleiðing samsæriskenninga móðurinnar

Þegar 23 ára gömul dóttir Shemirani var greind með krabbamein fyrir nokkrum árum segja tveir synir hennar að samsæriskenningar hennar um lyf og læknavísindi hafi valdið dauða systur þeirra. Þær hafi orðið til þess að Palmon Shemirani hafnaði því að gangast undir lyfjameðferðina sem læknar sögðu bjarga lífi hennar.

„Systir mín lést sem bein afleiðing af gjörðum mömmu minnar og skoðunum og ég vil ekki að nokkur annar þurfi að ganga í gegnum sama sársauka og missi og ég hef þurft að gera,“ segir Sebastian Shemirani, eldri bróður Palomu við BBC.

Bræðurnir telja að samfélagsmiðlafyrirtæki ættu að taka upplýsingafalsi eins og því sem móðir þeirra dreifir fastari tökum.

Shemirani svaraði ekki ásökunum sona sinna. Hún og fyrrverandi eignmaður hennar saka bresku heilbrigðisþjónustunni NHS um að hafa drepið dóttur þeirra og hylma yfir það. BBC segist ekki hafa séð nein gögn sem styðji fullyrðingar þeirra.

Alin upp við Inforwars og kukl

Bræðurnir segja að þau systkinin hafi verið alin upp við samsæriskenningar móður þeirra. Þannig hafi þau hlustað á Alex Jones, alræmdan bandarískan samsæriskenningasmið, ljúga um hvernig fjöldamorð á ungum börnum í Sandy Hook-skólanum í Bandaríkjunum hefði verið sviðsett þegar þau voru á leiðinni í skólann.

Andúð móður þeirra á læknavísindum hafi aðeins eflst eftir að hún greindist með brjóstakrabbamein árið 2012. Meinið hafi verið fjarlægt með skurðaðgerð en Shemirani haldi því fram að hún hafi losnað við það með söfum og kaffistólpípum.

Paloma er sögð hafa tileinkað sér sumar ranghugmyndir móður sinnar um heilbrigðisvísindi. Hún hafi neitað að láta bólusetja sig gegn Covid-19. 

Tókst á við meinið með söfum og stólpípum

Eftir að hún greindist með krabbamein árið 2023 virðist móðir hennar hafa þrýst á hana að samþykkja ekki geislameðferðina. Í textaskilaboðum frá Shemirani sem fyrrverandi kærasti Palomu sýndi BBC sagði hún honum að leyfa dóttur sinni ekki að samþykkja neitt um lyfjameðferðina eða aðra meðferð á sjúkrahúsi.

Í kjölfarið ákvað Paloma að gangast ekki undir lyfjameðferð. Þess í stað hóf hún svonefnda Gerson-meðferðin, hjávísindameðferð sem gengur út á safakúra og stólpípur, að ráðum fyrrverandi félaga móður sinnar.

Eftir það fór henni aðeins hrakandi. Vinkona Palomu sem var í sambandi við hana á þessum tíma segir BBC að þegar hún fékk nýjan hnúð í handakrikanum hafi móðir hennar sagt henni að það væri krabbameinið á leið út úr líkamanum.

Paloma lést eftir að hún fékk hjartaáfall af völdum krabbameins í júlí í fyrra. Opinber rannsókn á dauða hennar á hað hefjast í næsta mánuði.