Héldu fjörugt mót í Vík til styrktar ekkju Pálma

Pálmi lést í vinnuslysi þann 28. febrúar síðastliðinn og lét eftir sig sambýliskonu og tvö börn. Allur ágóði skráningargjalda af hátíðinni um helgina rann óskiptur til þeirra.

Á hátíðinni, sem kallast Pálminn, var keppt í badminton, fótbolta, körfubolta og golfi auk þess sem að samkvæmt dagskrárlýsingu var boðið upp á spilakvöld, rafhjólatúr, varðeld og 60 metra nektarsprett, og ljóst að Pálma hefur verið minnst með gleðilegum hætti.

Einn af þeim sem nutu þess að koma saman í Vík um helgina var körfuboltamaðurinn Justin Shouse sem einmitt hóf sinn magnaða feril hér á landi með liði Drangs í Mýrdalnum. Þar léku þeir Pálmi saman eins og Shouse rifjar upp í færslu á Facebook.

„Þetta var ótrúlegur viðburður, íþróttahátíð til að fagna lífi og keppnisanda Pálma Kristjánssonar, fyrrverandi liðsfélaga og frábærrar manneskju sem lést í hörmulegu slysi 41 árs að aldri fyrr á þessu ári,“ skrifar Shouse.

„Við spiluðum saman fyrir Drang í Vík í Mýrdal tímabilið 2005/06. Það eru liðin 20 ár síðan þá, ótrúlegt hvað tíminn líður og ótrúlegt að sjá þetta samfélag koma saman til að minnast Pálma og stunda uppáhaldsíþróttir hans.

Pálmi ólst upp í Vík og hélt áfram að vera óaðskiljanlegur hluti af bænum öll þessi ár. Þegar ég hitti hann var hann 21 árs og hafði nýlega stofnað fótboltalið fyrir sig og vini sína í bænum. G & T var lið sem byggðist á vináttu, keppni, liðsanda og auðvitað kannski gin og tónik eftir leik,“ skrifar Shouse og heldur áfram.

„Pálmi var meira leikmaður en körfuboltamaður hvað varðar færni en hann spilaði með keppnisanda sem bætti upp fyrir það.

Hann var byrjunarmaður sem skotbakvörður okkar í liðinu, varnarhæfileikar hans, liðsandinn og vilji til að vinna héldu okkur í úrslitakeppnissæti í 1. deildinni langt fram á tímabilið.

Við völdum að spila Pálma meira og losa okkur við einn af atvinnumönnum okkar vegna þess að vilji Pálma til að vinna fyrir samfélagið og jákvæðni hans var óumdeilanleg...

Við elskuðum að keppa fyrir þetta litla samfélag þar sem menn fylltu íþróttahúsið og börðu á veggina á meðan gestaliðið skaut vítaskot.

Pálminn er hátíð íþrótta og gleði til minningar um Pálma,“ skrifar Shouse, greinilega annt um að hafa getað minnst Pálma með þessum hætti þó að hann gangi núna um „eins og Frankenstein“ eftir sinn fyrsta körfuboltaleik í næstum sex ár.