Grunur um í­kveikju á Hjarðar­haga

Þann 22. maí síðastliðinn kviknaði mikill eldur í kjallara fjölbýlishúss að Hjarðarhaga í Vesturbænum með þeim afleiðingum að tveir íbúar kjallarans létust. Þriðji maður komst út við illan leik og sá fjórði var fjarri heimili sínu.

Bensínbrúsar í kjallaranum

Vísir greindi frá því daginn eftir brunann að talsvert magn bensínbrúsa hefði fundist inni í kjallaranum og að lögregla rannsakaði meðal annars hvor kveikt hefði verið í.

Rannsókn tæknideildar Lögreglunnar á höfuðborgarsvæðinu hefur nú staðfest að bensín hafi verið á vettvangi. E. Agnes Eide Kristínardóttir, yfirlögregluþjónn miðlægrar rannsóknardeildar Lögreglunnar á höfuðborgarsvæðinu, segir í samtali við Vísi að umtalsvert magn bensíns hafi verið sýnum sem tekin voru á vettvangi.

Enginn grunaður að svo stöddu

Agnes segir að bensín á vettvangi veki grun lögreglu um að kveikt hafi verið í af ásetningi og það sé nú til rannsóknar.

Þó sé of snemmt að segja til um það hvort einhver sé grunaður um að hafa lagt eld að kjallaranum. Sári Morg Gergö, sem komst lífs af úr brunanum, hefur greint frá því að hann gruni meðleigjandi sinn til margra ára um að hafa kveikt í kjallaranum með bensíni og gashylkjum. Meðleigjandinn, bandarískur karlmaður, lést í brunanum ásamt vini Sára frá Tékklandi.