Óttast á­hrif orð­ræðu Trumps á fjár­festa

Hún sagði ummæli Trumps þar sem hann neitaði að útiloka það að beita hervaldi til að ná yfirráðum á Grænlandi vera sérstaklega hættuleg og að þau gætu valdið gífurlegum skaða á námuvinnslu í Grænlandi, þar sem fjárfestum væri sérstaklega illa

Þetta segir ráðherrann í samtali við Financial Times (áskriftarvefur) og en annar heimildarmaður miðilsins segir að forsvarsmenn námufélaga sem hefðu starfsemi á Grænlandi til skoðunar hefðu farið fram á vilyrði fyrir því að leyfi þeirra til námuvinnslu yrðu ekki felld úr gildi, verði Grænland hernumið af Bandaríkjunum.

Grænlendingar hafa reynt að ná til námufélaga heimsins að undanförnu og reynt að teikna Grænland upp sem stöðugt ríki sem er auðugt ýmsum góðmálmum og svokölluðum sjaldgæfum málmum, þar sem Kínverjar eru alfarið ráðandi á heimsvísu.

Sjá einnig: „Þetta snýst um sjaldgæfa málma, þetta snýst um auðlindir“

Nathanielsen segist ekki telja að Trump ætli sér að gera innrás í Grænland. Þess í stað heyri hún hann segja að nýta eigi náttúruauðlindir Grænlands.

„Þar erum við alfarið sammála honum,“ segir hún.

Nathanielsen segir einnig að hún telji forsvarsmenn námufélaga í Grænlandi ekki áhyggjufulla. Þess í stað séu þeir ráðvilltir.

„Allir eru að bíða með öndina í hálsinum eftir því að sjá hver raunveruleg skilaboðin eru? Hvar endar þetta allt saman?“

Segir skort á fjárfestingu í námuvinnslu

Hún segir að yfirráð Kínverja á sviði sjaldgæfra málma, sem eru gífurlega mikilvægir við framleiðslu nútímatækja eins og síma, skjáa og sömuleiðis hergagna, séu orðin öllum ljós. Ráðamenn á Vesturlöndum hafi áttað sig á þörfinni á því að finna fleiri leiðir til að verða sér út um þessa málma.

Þetta hefur þó ekki skilað sér í auknum fjárfestingum sem þarf til að finna þessa málma og sækja þá í jörðu. Það sagði Nathanielsen vera mikil mistök hjá ráðamönnum á Vesturlöndum.

„Ég held að allir séu sofandi og þeir þurfa að vakna.“

Sjaldgæfir málmar svokallaðir finnast víðsvegar í skorpu jarðarinnar en þeir finnast sjaldan í æðum eða á takmörkuðum svæðum og eru þessi stað oftar en ekki dreifðir í bergi, þó meira af þeim finnist iðulega í tilteknu bergi.

Það getur því reynst erfitt að sækja þá í jörðina og vinnsla þeirra er sömuleiðis erfið og hefur slæm áhrif á umhverfið.

Kínverjar eru með gífurlegt forskot á heimsvísu þegar kemur að greftri og vinnslu sjaldgæfra málma en vinnslan hefur dregist verulega saman í Bandaríkjunum á undanförnum áratugum.

Sérfræðingar telja Kína með allt að níutíu prósenta markaðshlutdeild á þessu sviði, heilt yfir, en í tilteknum málmum eru Kínverjar nánast þeir einu sem vinna þá.

Vilja fleiri námur

Aukin námuvinnsla á Grænlandi og tekjur af henni eru lykilatriði í ætlunum margra Grænlendinga varðandi sjálfstæði frá Danmörku. Tekjurnar gætu auðveldað Grænlendingum verulega að standa á eigin fótum, án fjárhagslegrar aðstoðar frá Danmörku.

Í frétt FT segir að mörg stór námufélög hafi fengið starfsleyfi á Grænlandi en engin umfangsmikil námuvinnsla sé komin í gang og það hafi valdið embættismönnum vonbrigðum.

Þá segir miðillinn að hik forsvarsmanna þessara félaga megi að miklu leyti rekja til fjarlægðar Grænlands, skorts á innviðum eins og vegum og þess hve erfitt sé að stunda námuvinnslu allan ársins hring.