Fékk 542 þúsund króna rukkun fyrir hreindýrakjötið

„Ég ætlaði bara að greiða, rak svo augun í töluna, ég var ekki alveg með þessa hálfu milljón inni á kortinu,“ segir Gunnar Georgsson hlæjandi í samtali við Vísi en hann var staddur á sjálfsafgreiðslukassa í Nettó í Mjódd þegar atvikið átti sér stað. Hann vakti athygli á mistökunum með mynd á Facebook hópnum Vertu á verði - eftirlit með verðlagi.

„Þannig ég kallaði bara í starfsmann og sagði honum að ég ætti tæplega efni á þessu. Hann var auðvitað bara starfsmaður á plani og gat ekki útskýrt hvað hefði gerst,“ segir Gunnar. Hann segir í færslu sinni að honum hafi einfaldlega þótt þetta of fyndið til að deila þessu ekki og fundist rétt að minna fólk á að kíkja á upphæðina áður en kortinu er hent upp að posanum.

Engir viðskiptavinir ofrukkaðir fyrir hreindýrið

„Það sem gerðist í þessu tilfelli er að strikamerkið frá innlendum birgja hefur dottið af vörunni og það skannast þarna rangt erlent strikamerki,“ segir Gunnur Líf Gunnarsdóttir framkvæmdastjóri verslunar-og mannauðssviðs hjá Samkaupum í skriflegu svari til Vísis.

Hún segir strikamerkið hafa verið með ranga talnarunu fyrir kerfi Nettó og með forskráða þyngd upp á 0,378 kíló en í erlendu rununni er tölustafurinn 9 á röngum stað og því kemur að sögn Gunnu upp 90 og svo 378 grömm.

„Það ætti því ekki neinn að hafa slegið neitt vitlaust inn, hvorki starfsmaður né viðskiptavinur, og vogirnar okkar eru löggildar og eiga að vigta allt rétt. En þarna eru mistökin að strikamerkið sem límt hefur verið á vöruna af okkar birgja hefur fallið af og hefði í raun átt að koma villa á kassann en hann las þetta bara sem ranga þyngd í staðin. Við höfum komið í veg fyrir að þetta geti átt sér stað aftur í okkar tölvukerfum.“

Gunnur tekur fram að miðað við birgjastöðu verslana þá hafi varan ekki farið rangt í gegnum kerfið hjá Nettó. Enginn viðskiptavinur hafi þannig verið ofrukkaður fyrir vöruna, sem sagt hreindýra innlæri. Um sé að ræða algjört einsdæmi og hafa engar frekari ábendingar um sambærileg mál borist.