35 fer­metrar á 220 þúsund krónur

Um hundrað þúsund manns eru hluti af Facebook-síðunni Leiga sem er einn vettvangur fyrir fólk að auglýsa íbúðir til leigu. Ný íbúð var auglýst á síðunni í gær:

„Til leigu 35m2 íbúð í 104 Reykjavík. Um er að ræða tveggja herbergja íbúð sem er nýstandsett og leigist með öllum húsbúnaði, þ.e. rúm, sófi, sængur o.fl. Leiguverðið er 220þ.kr. á mánuði (hiti- og rafmagn innifalið) en til tryggingar á efndum á leigusamningi þarf leigutaki að greiða andvirði tveggja mánaða leigu, þ.e. 440þ.kr. Er laus frá og með 1. mars n.k. Eingöngu reglusamir aðilar aðilar koma til greina en reykingar eða dýrahald er ekki leyft.“

Er fólk beðið um að hafa samband með skilaboðum á Facebook. Auglýsingunni fylgja myndir þar sem sést að um er að ræða bílskúr sem hefur verið breitt í litla íbúð.

220 þúsund krónur fyrir 35 fermetra gefur fermetraverðið 6.300 krónur á fermetrann.

Illa farið með fólk

„Það er farið illa með þá sem þurfa þak yfir höfuðið,“ segir Garðar Örn Hinriksson fyrrverandi knattspyrnudómari á Facebook, einn þeirra sem rak augun í auglýsinguna.

Meðalfermetraverð á höfuðborgarsvæðinu árið 2023 var á bilinu 2.800 krónur til 4.200 krónur. Dýrast var að leigja á fermetrann í Vesturbæ Reykjavíkur en þar á eftir í miðbænum, Laugardalnum, Seltjarnarnesinu og Fossvoginum. Lægsta fermetraverðið var í póstnúmeri 103 og í póstnúmerum 201 og 203 í Kópavogi. Þar er fermetraverðið undir þrjú þúsund krónur en eignirnar þar eru heilt yfir stærri.

Ein slík er einmitt auglýst í Lækjarsmára í póstnúmeri 201 í Kópavogi. 350 þúsund krónur fyrir 94 fermetra. Rúmlega 3700 krónur á fermetrann.

Við Granaskjól í Vesturbæ Reykjavíkur, þar sem meðalfermetraverðið var rúmar 4.200 krónur árið 2023, er innréttaður bílskúr í boði. 35 fermetrar fyrir 170 þúsund krónur á mánuði. Innifalið er rafmagn, hiti og Internet. Tæplega 4.900 krónur á fermetrann. Mikill áhugi virðist á íbúðinni.

Hið sama má segja um 70 fermetra íbúð í Maríubakka 22 í Breiðholtinu. 270 þúsund króna leiga sem gerir 3.800 krónur á fermetrann. Á völlunum eru svo 60 fermetrar í boði fyrir 260 þúsund krónur sem svarar til 4300 króna á fermetrann.

Eftirspurnin eftir íbúð á höfuðborgarsvæðinu er slík að það er sama hvað boðið er upp á. Fjöldi fólks svarar auglýsingunum, sendir skilaboð á leigusala og ítrekar með ummælum við auglýsinguna til að auka líkurnar á að leigusalinn svari skilaboðunum.

En það eru ekki bara stórar íbúðir í Kópavogi. Þar er nú 35 fermetra stúdíóíbúð, innréttaður bílskúr, til leigu á 220 þúsund krónur á mánuði. Það svarar til tæplega 6.300 króna á fermetrann. Íbúðin fær reyndar mikið rós fyrir skipulag og rigndi fyrirspurnum yfir leigusalann.

Þá eru auglýst herbergi til leigu í húsum og er leigan þar um og yfir hundrað þúsund krónur á mánuði fyrir herbergið. Eitt slíkt er á Langholtsvegi.

Fram kom í leiguskrá Hús- og mannvirkjastofnunar á dögunum að ef litið væri til höfuðborgarsvæðisins í heild sinni næmi miðgildi leiguverðs á hvern fermetra 3.269 krónur árið 2023 sem er 17% hærra en miðgildi fermetraverðs í nágrenni höfuðborgarsvæðisins.

Annars staðar á landinu var miðgildi verðs á leigu rétt rúmlega 2.000 kr. á fermetra. Líkt og sjá má á mynd hér að neðan má sjá marktækan mun á verði á fermetra eftir stærð íbúða og er það t.d. yfir 3.500 krónur fyrir tveggja herbergja íbúð á höfuðborgarsvæðinu en undir 2.500 krónur fyrir fjögurra herbergja íbúð á sama svæði.