Verkfallsað­gerðir breið­fylkingarinnar yrðu sam­ræmdar

Forysta breiðfylkingarinnar koma saman til fundar í dag en í gærkvöldi fékk samninganefnd VR umboð trúnaðarráðs til að boða til aðgerða. Sólveig Anna Jónsdóttir formaður Eflingar segir félagið hafa sett af stað könnun.

„Sem nær til vissra hópa innan félagsins til að kanna hug þeirra til mögulegra verkfallsaðgerða. Á endanum er það svo samninganefnd félagsins sem tekur ákvörðun um hvort farið verði í boðun verkfallsaðgerða.

Seðlabankastjóri staðfesti á fundi efnahags- og viðskiptanefndar Alþingis í gær að möguleg ákvæði um þróun vaxta í forsendum kjarasamninga sneiddu ekki að sjálfstæði bankans. Aðilar vinnumarkaðarins gætu samið um hvað sem er án aðkomu bankans sem tæki sínar vaxtaákvarðanir sjálfstætt.

Þar með ætti sú fyrirstaða Samtaka atvinnulífsins við þann hluta forsenduákvæða ekki að trufla gerð kjarasamninga. Vilhjálmur Birgisson formaður Starfsgreinasambandsins segir þessa afstöðu seðlabankastjóra ekki koma á óvart.

„Enda liggur alveg fyrir að við gerum okkur fulla grein fyrir sjálfstæði Seðlabankans. Við erum fyrst og fremst að beina sjónum okkar að því að allir aðilar taki þátt í þessari vegferð sem við viljum fara. Sem er að stuðla að hjöðnun verðbólgu og lækkun vaxta. Til að Seðlabankinn fái tækifæri til að lækka vexti verða allir að axla sína ábyrgð. Það er ekki hægt að leggja alla áhættu á herðar launafólks. Um það snýst þetta mál,“ segir Vilhjálmur.

Formenn VR og Eflingar taka undir þetta sjónarmið. Sólveig Anna segir forsenduákvæðin snúast um að verja launafólk í samningi með litum launahækkunum til fjögurra ára.

„Það að Samtök atvinnulífsins hafi sýnt þessa þvermóðsku þegar kemur að umræðum um þennan sjálfsagða lið er auðvitað miður. En ég bind enn vonir við að þau nái áttum og setjist aftur við samningaborðið með okkur,“ segir formaður Eflingar.

Vilhjálmur segir dapurlegt þegar launaliðurinn og þar með lang stærsti hluti kjarasamninga liggi fyrir, skuli menn ekki sitja við samningaborðið og reyna að finna lausn á deilum um forsendur.

„En ég ítreka að þegar tveir deila þurfa oft á tíðum báðir aðilar að gefa eftir og mætast á miðri leið. Og það eru í raun og veru mín skilaboð til Samtaka atvinnulífsins; að við setjumst niður og finnum lausn á þessu máli,“ segir Vilhjálmur.

Miði málum hins vegar ekkert áfram muni félögin innan breiðfylkingar samræma sínar aðgerðir.

„Fólk er með ólík baklönd. Það þarf að tryggja að farið sé að öllu með réttum hætti. En að sjálfsögðu ef komi til þess að við séum á þeim stað, samræmum við aðgerðir og gætum þess að áhrifin verði þá sem mest,“ segir Sólveig Anna Jónsdóttir.

Sigríður Margrét Oddsdóttir framkvæmdastjóri Samtaka atvinnulífsins varð ekki við ósk fréttastofu um viðtal við hana vegna málsins í dag.