Tónninn gjör­breyttist þegar „eiginkonan“ hafði sam­band

Málið var tekið fyrir af kærunefnd vöru- og þjónustukaupa sem kaupandinn, búsettur í Bandaríkjunum, leitaði til. Forsagan er sú að í febrúar 2023 pantaði hann sérsmíðaðan skáp af smiðnum í gegnum vefsíðu og greiddi fjögur þúsund dollara fyrir, um hálfa milljón íslenskra króna.

Staðfesting barst á greiðslunni og samkvæmt reikningnum átti skápurinn að verða afhentur eftir sjö til níu vikur. Að þeim tíma liðnum reyndi kaupandinn að ná í smiðinn um stöðuna á verkinu en þar var fátt um svör að fá.

Í júní 2023 fékk kaupandinn tölvupóst frá smiðnum sem bar sig illa. Sökum heilsufarsbrests og fjárhagsvandræða hefði hann ekki getað orðið við pöntuninni. Hann stefndi á að reyna að greiða honum kaupverð skápsins fyrir árslok. Kaupandinn krafðist nokkrum vikum síðar endurgreiðslu innan sólarhrings en ekkert varð af henni og engin merki þess að skápurinn væri í smíðum.

Brást skjótt við skilaboðum eiginkonunnar

Kaupandinn brá að það ráð að hafa samband við smiðinn undir nafni eiginkonu sinnar um þetta leyti og spyrjast fyrir um annan sérsmíðaðan hlut til sölu. Sömuleiðis hvort í boði væri að senda hlutinn til Bandaríkjanna.

Þá brást smiðurinn skjótt við og kvaðst geta sent hlutinn strax þangað. Hvergi var minnst á tafir á afhendingu, fjárhagsvandræði eða heilsufarsbrest. Þegar kaupandinn svipti hulunni af sjálfum sér, ef svo má segja, hætti smiðurinn að svara honum.

Kærunefnd vöru- og þjónustukaupa hefur haft málið á sínu borði síðan í ágúst, leitað svara hjá smiðnum en ekki fengið nein. Úrskurður var því kveðinn upp miðað við gögn kaupanda í málinu og var niðurstaðan skýr. Smiðurinn þarf að greiða kaupandanum fjögur þúsund dollara auk málskostnaðargjalds upp á 35 þúsund krónur.