„Ég vil helst spila 11 á móti 11“

Hallgrímur var fengin til að lýsa lokamínútunum sem voru hádramatískar. 

„Við vorum nýbúnir að skjóta að slá, þeir komast í færi hinum megin. Ég sé svo ekki hvað gerist en það er dæmt víti og við missum leikmann út af vellinum með rautt spjald en sem betur fer fáum við ekki mark á okkur úr vítinu. Hann skýtur í tréverkið. Það var svo frábær karakter hjá liðinu að koma til baka úr þessu einum færri og skorum sigurmarkið.“

Hallgrímur hefði þó viljað sá suma hluti betri hjá sínum mönnum og nefndi þar pressuna hjá sínu liði, þá fannst honum svekkjandi að fá mark á sig þegar hafsentinn hans var utan vallar.

„Mér fannst pressan ekki nógu góð þegar Stjarnan var að láta boltann ganga en við skorum mark og sköpum allavega þrjú góð færi. Svo í seinni hálfleik eigum við sláarskot. Það var hins vegar svekkjandi að fá á sig mark rétt fyrir hálfleik þar sem að einn leikmaður okkar er meiddur fyrir utan völlinn sem gerir það að verkum að við erum einum færri. Hafsentinn okkar er fyrir utan og mátti ekki koma inn á sem ég held að hafi verið rétt en samt pirrandi að vera liðið sem lendir í því.“

Ásgeir Sigurgeirsson kom inn á sem varamaður á 67. mínútu og sá til þess að öll stigin fóru til KA.

„Ásgeir er flottur leikmaður, hann kom inn á og gerði það sem maður á að gera sem varamaður. Maður kemur inn á og maður leggur sig fram, sýnir að maður skiptir máli og hann gerði það í dag og tryggði okkur frábæran sigur.“

Það hefur verið mikið álag á KA undanfarið en fyrir þennan leik náði KA um það bil viku í frí. 

„Við fengum meiri tíma til að hvíla okkur og eins og þú sérð að þótt við höfum verið einum færri hér í lokin að þá höfum við samt orku til að klára leikinn. Skiptingarnar gerðu það líka að verkum að frískir menn komu inn á völlinn. Við erum bara alltaf að vinna í okkar málum og gera eins vel og við getum.“

KA á tvo leiki eftir í deild, þar af frestaðan leik á móti FH.

„Við vitum það að ef við klárum þessa leiki sem eru eftir að þá eigum við ágætis séns á að enda í topp sex og það er klárlega markmiðið. Það er búið að vera að tala um einhverja neikvæðni hjá okkur en við erum alls ekki neikvæðir. Við erum bara gríðarlega ánægðir með það sem hefur verið í gangi í sumar. Við ætluðum að vera ofar í deildinni og nú er fullur fókus á að enda í efri helming deildarinnar.“ 

Sveinn Margeir fékk rautt spjald þegar skammt var til leiksloka, Daníel Hafsteinsson var í banni í dag vegna þess að hann fékk rautt í síðasta leik og þá er stutt síðan að Dusan Brkovic fékk rautt spjald í leik og var í banni. Hallgrímur hafði ekki mörgu við það að bæta. 

„Við erum mjög flottir þegar við erum einum færri en ég vil helst spila 11 á móti 11.“

Leikurinn við FH fer fram næstkomandi miðvikudag. 

„Það verður hörkuleikur, við spilum góðan leik við þá fyrr í sumar sem við unnum. Við förum í Hafnafjörðinn fullir sjálfstraust eftir þennan leik og gefum FH góðan leik.“