Bjóða upp á þrjátíu ára gömul verð

Atli Ísleifsson skrifar 16. ágúst 2023 08:49

Magnús Hafliðason er forstjóri Domino's hér á landi. Dominos

Domino‘s selur í dag átta tegundir af pizzum á sama verði og pizzurnar kostuðu fyrir þrjátíu árum. Ástæðan er sú að staðurinn opnaði hér á landi þann 16. ágúst 1993.

Þetta kemur fram í tilkynningu frá Domino‘s. Þannig kostar til dæmis stór Domino‘s Classic pítsa 1.550 krónur, Hawaii-pítsa 1.199 krónur og Domino‘s Deluxe 1.390 krónur.

Alls verður boðið upp á átta pítsur á upprunalega verðinu.

Í tilkynningunni segir að upprunalegur matseðill Domino‘s á Íslandi hafi um margt frábrugðinn þeim sem landsmenn þekki í dag.

„Á þeim tíma var til dæmis ekki mögulegt að fá rjómaost né piparost sem eru á meðal vinsælustu áleggja fyrirtækisins í dag. Þó eru fjórar pizzur enn á matseðlinum í dag en þær eru Domino‘s Extra, Domino‘s Deluxe, Hawaiian og Domino‘s Classic. Dæmi um pizzur sem ekki eru á matseðli í dag eru Fjögurra osta pizza og Hamborgarapizza sem var með hakki, lauk og papriku – samsetning sem er barn síns tíma,“ segir í tilkynningunni.

Domino‘s starfrækir 22 staði og starfa þar um sex hundruð manns.

Í tilkynningunni segir ennfremur að í tilefni tímamótunum sé von á Russell Weiner, forstjóra Domino‘s, til landsins og mun hann heimsækja útibú fyrirtækisins og kynna sér starfsemina hér á landi ásamt því að ferðast um Ísland næstu daga.