Líkams­leifar fundust í flakinu af Titan

Brak úr kafbátnum var flutt til hafnar í Kanada í gær en að sögn talsmanna strandgæslunnar verða líkamsleifarnar fluttar til Bandaríkjanna, þar sem þær verða rannsakaðar.

Þá verður ráðist í umfangsmikla rannsókn á því nákvæmlega hvað gerðist. Farþegarnir eru taldir hafa látist samstundis þegar kafbáturinn gaf sig undan þrýstingi.

Meðal þess sem sást á hafnarbakkanum í gær voru hlutar af ytra byrði kafbátsins, skíðin undir honum og kaplar og rafeindabúnaður. Pelagic Research Services, sem eiga könnunarfarið sem fann Titan, sögðust í gær hafa lokið aðgerðum á vettvangi.

Samgönguyfirvöld í Bandaríkjunum segja atvikið hafa verið tilkynnt sem „alvarlegt sjóslys“ og að strandgæslan muni fara fyrir rannsókn þess. Vonast er til þess að brakið og mögulega varðveitt gögn muni varpa ljósi á hvað gerðist.