„Er enginn ó­sigrandi og geti labbað um Ís­land með guðs gefandi rétt til að vinna alla leiki“

„Ég útskýri það bara á þann hátt að þú þarf að geta varist fyrirgjöfum þegar þær koma og það var það sem fór með okkur, lélegur varnarleikur inn í teig. Ég er ekki með töluna en mig grunar að þeir hafi ekki komist mikið oftar inn í teig hjá okkur en mörkin sem þeir skora. Þeir nýttu vel það sem þeir fengu, við vorum ekki á tánum og þá er auðvitað erfitt að vinna leiki.“

Í tvígang skora HK-ingar eftir mikinn klaufagang í vörn Breiðabliks. Óskar taldi að fleiri mörk væri sennilega hægt að skrá sem mistök. Á sama tíma og hann er ósáttur með vörnina þá telur hann sjá ákveðnar framfarir í spili liðsins.

„Það er sennilega hægt að telja fleiri en tvö mörk sem stimplast sem varnarmistök. Í síðasta markinu er Arnór Sveinn bara orðinn þreyttur og það getur alltaf gerst en fyrir utan það þá var varnarleikurinn auðvitað ekki nógu góður og það er eitthvað sem við þurfum að laga.“

„Við fórum af stað inn í þennan leik með ákveðna hugmyndafræði og mér fannst hún að mörgu leyti ganga upp. Við erum búnir að vera fyrirsjáanlegir í spilinu okkar að undanförnu og við þurftum að finna okkur aðeins í því aftur. Mér fannst það ganga vel í dag en svo bara telur það ekki þegar þú verst ekki í þínum eigin vítateig.“

Spurður að því hvort þessi leikur hefði spilast svipað og fyrri viðureign liðanna í apríl var Óskar ósammála því.

„Mér fannst þessi leikur ekki vera eins og fyrri leikurinn. Mér þótti sá leikur vera meira fram og til baka á meðan í kvöld vorum við með boltann hátt í 90 prósent af leiknum. En þegar þú verst ekki þá skiptir það bara engu máli. Mér finnst ekki hægt að bera þessa tvo leiki saman þó svo að þeir hafi unnið báða. Þeir eiga hvort sitt líf. Ég segi bara aftur ef þú verst ekki inn í teig, verst ekki fyrirgjöfum, dekkar ekki mennina þína þá refsa menn í þessari deild.“

En hefur Óskar áhyggjur af stöðu liðsins?

„Ég hef engar áhyggjur af stöðu liðsins. Við höfum ekki tapað síðan 23. apríl. Við þurfum líka að setja þetta í samhengi. Það er enginn ósigrandi og geti labbað um Ísland með guðs gefandi rétt til að vinna alla leiki og ef hann tapar þá sé lífið búið. Auðvitað maður pínu áhyggjur af því að fá á sig fimm mörk og þegar menn eru ekki að dekka en ég hef ekki áhyggjur af þessu tapi.“

Eyþór Wöhler lék ekki með HK í kvöld þar sem hann er samningsbundinn Breiðablik. Spurður að því hvort Breiðablik ætli að sækja Eyþór í glugganum svaraði Óskar litlu.

„Það verður bara að koma í ljós. Það er langt þar til glugginn opnar og við þurfum bara að sjá hvernig hlutirnir þróast. Eyþór er að spila vel fyrir HK og er að fá þær mínútur sem hann þarf að fá. Það þarf mikið til þess að við rífum hann úr þeim riðma.“