„Það verður fróð­legt að lesa þá skýrslu sem hlýtur að liggja fyrir“

„Við urðum bara mjög hissa þegar við heyrðum af þessu og það eru margar ástæður fyrir því. Í fyrsta lagi er þetta hluti af viðbúnaði Almannavarna. Þegar það var ákveðið að kaupa þessa vél, sem var afhent 2009, þá lá fyrir mjög ítarleg greiningarvinna á þörfinni, í fyrsta lagi hvort það ætti að vera flugvél og síðan hvaða búnaður og í hvaða verkefnum hún átti að vera. Við tókum mikinn þátt í þeirri vinnu og þá var þetta fullkomið tæki sem kom til landsins og við bundum miklar vonir við að geta nýtt alltaf,“ segir Víðir í samtali við fréttastofu.

Hann segir að Almannavarnir hafi litið á leigu vélarinnar erlendis sem neyðarúrræði vegna halla ríkissjóðs í kjölfar efnahagshrunsins og benti á að vélin hefði verið kölluð til baka úr verkefnum erlendis í tengslum við hamfarir eða slys á Íslandi. 

„Þarna vorum við komin með tæki sem við héldum að myndi hjálpa mjög mikið, skiptir miklu máli til að fylgjast með því sem er að gerast í kringum okkur og annað slíkt. Þannig að þetta kemur okkur verulega á óvart, að þetta hafi verið niðurstaðan, og ég reikna með að þarna liggi að baki einhvern ítarleg greining. En við höfum ekki verið þátttakendur í þeirri greiningu.

„Með ólíkindum að við séum að eiga þetta samtal“

Víðir segir að nýverið hafi vélin verið notuð í ýmis verkefni hér á landi.

„Það er ekki langt síðan við notuðum hana vegna alvarlegs bílslyss í Öræfum, þar sem fimm einstaklingar voru fluttir með henni frá Hornafirði í bæinn. Það er nú svona nýjasta dæmið. Þegar hún er hérna þá er hún notuð. En eins og ég segi, við litum alltaf á það sem einhverja neyðarráðstöfun að hún væri svona mikið erlendis.“

Það er von Víðis að Alþingi, hvar málið verður nú rætt, komist að þeirri niðurstöðu að Landhelgisgæslan fái þær fjárveitingar sem hún þurfi, en halli á rekstri hennar er sögð ástæða fyrirhugaðrar sölu á vélinni. Hann segir margt geta gerst sem mæli með því að vélin verði áfram til reiðu fyrir viðbragðsaðila.

„Það er svo ótrúlega margt. Bæði getan okkar í leit og björgun, eins og til dæmis bara á hálendinu. Þegar þyrlur gæslunnar fara til aðstoðar við skip sem eru langt í burtu, og margt annað. Síðan þessi vísindalegi þáttur sem við höfum notað hana í og eins þegar það koma hamfarir og við þurfum að koma hjálparliði á staðinn eða sækja fólk og koma því burt eftir slys. Þetta er vél sem er sérhæfð og ætluð í það og það er með ólíkindum að við séum að eiga þetta samtal í dag finnst mér,“ segir Víðir.

Vonar að Alþingi ranki við sér

Víðir segist ekki átta sig á því að dómsmálaráðherra hafi komist að þeirri ákvörðun að vélina skyldi selja.

„Ég skil þetta ekki. Eins og ég segi, ég geri ráð fyrir að dómsmálaráðuneytið hafi lagst í mjög ítarlega greiningu á þessu. Hún var keypt eftir mjög ítarlega greiningu og ef það á að selja hana þá geri ég ráð fyrir að það sé ekki minni vinna lögð í að meta hvort þetta sé eina leiðin út úr þessu máli. Það verður fróðlegt að lesa þá skýrslu sem hlýtur að liggja fyrir.“

Vonastu til þess að þessi ákvörðun verði dregin til baka?

„Það er náttúrulega í höndum annarra en okkar. Nú á að ræða málið á Alþingi og í þingnefndum. Þar liggur fjárveitingarvaldið og það er ákvörðun Alþingis um það hvort Landhelgisgæslan fái þá fjármuni sem þarf til þess að sinna þessu verkefni.“