Verð fjölda vara hefur nú hækkað um 10 til 20 penní og er verðið á venjulegum ostborgara komið úr 99 penníum í 1,19 pund. Í tölvupósti til viðskiptavina segir Alistair Macrow, forstjóri McDonald's í Bretlandi og Írlandi, að stjórnendur hafi staðið frammi fyrir erfiðum valkostum.
„Við vitum að verðhækkanir eru aldrei góðar fréttir, en við höfum lágmarkað þessar hækkanir og tafið þær eins lengi og mögulegt var.“ Bætti hann við að verð á vissum vörum myndi haldast óbreytt.
Hækkar minna en sem nemur verðbólgu
Fram kemur í frétt breska ríkisútvarpsins BBC að verð á matseðli verði áfram misjafnt milli veitingastaða keðjunnar þar sem sumir þeirra séu reknir af sjálfstæðum sérleyfishöfum sem velji verð sitt út frá ráðleggingum McDonald‘s.
Auk ostborgarans hefur verð meðal annars verið hækkað á morgunverðarmáltíðum, stórum kaffidrykkjum og kjúklinganöggum.
Ef verð ostborgarans hefði hækkað í takt verðbólgu í Bretlandi myndi hann kosta 1,42 pund en kostar nú 1,19 pund líkt og áður segir. McDonald‘s rekur yfir 36 þúsund veitingastaði í yfir 100 löndum.
Í gær lýstu stjórnendur því yfir að til greina kæmi að fjölga tilboðsmáltíðum á matseðlum. Hækkun framfærslukostnaðar, einkum í Evrópu, hafi leitt til þess að sumir tekjulágir viðskiptavinir hafi fært sig í að kaupa ódýrari vörur og færri stórar máltíðir.